Mizoram thar Buhhum lei dan tur ngaihtuah

Mizoram tharchhuah Buhhum lei chungchang chu nimin khan Chief Minister Lalduhoma hovin sawrkar mi pawimawh ten an sawiho.

Chief Minister Office Conference Hall-a Mizoram Paddy & Rice Procurement Committee thutkhawm ah hian Agriculture Minister PC. Vanlalruata leh Food, Civil Supplies & Consumer Affairs Minister B. Lalchhanzova bakah Official pawimawh dang te an tel a, Supply Minister B. Lalchhanzova chuan sawrkarin buhfai lei leh hralh a kalpui thin dan chu tihdanglam hlek an tum tih a sawi a. “Model Code of Conduct hlih a nih hunah a taka kalpui tan kan tum dawn a. Chu kalphung tharah chuan kumtin sawrkar sum cheng vbc. 70 vel kan hum thei dawn a ni,” a ti a. He ruahmanna thar ah hian Ration Card Var hmangtute tana Ration buhfai lakna man chu tih to tumna a awm nia thudawn a ni bawk.

Nimin-a Meeting ah hian Minimum Support Price pe-a Mizoram loneitute tharchhuah buhhum man man deuh taka leisak theih a nih leh nih loh an sawi a. Chu mi kaihhnawih buh tharchhuah tihpun dan tur leh a chingtu tur thlan te, a chi inang chin a tul dan te, a leikhawm dan te, a herna leh a phurh kual dan thlengin an sawiho a. Tripura leh Assam sawrkarin hetiang an kalpui dan report te pawh a zirchiangtute hnen atangin ngaihthlak a ni a, chipchiar zawka lo zirchiang tur Team Supply Minister kaihhruaina hnuaiah din nghal a ni bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man