Sawrkar hmalakna inthuah leh inhnai lutuk te tihbo a nih theih nan ruahmanna siam a ni

Chief Minister Lalduhoma chuan sawrkar hmalakna inthuah leh inhnai lutuk te tihbo a nih theih nan Department tin in an project duan te chu Planning Board kaltlang zela thehluh tawh tur an tih thu a sawi.

Chief Minister hian nimin khan a Pisa-ah Excise & Narcotics Department hotute kawmin an Department dinhmun leh hmalakna te chipchiar takin a sawipui a, Chief Minister chuan Mizoram Ruihhlo Do Core Committee chu an thukhawm thar leh tih sawiin, ruihhlo Supply titlem tura hmalakna lam (supply reduction) chu Excise & Narcotics Department kutah dah a ni tih a sawi a. Chuvang chuan an hna a tam phah dawn thu leh mamawh pawh an nei dawn tih sawiin, “Sum leh pai pawh in mamawh dawn. Chuvang chuan Vawiin ah in dinhmun leh hmachhawp te hriat kan duh a ni,” a ti a. “Sawrkar hmalakna puitling zo ta lo hi sawi tur a lo awm nual mai a, hmalakna inthuah leh inhnai lutuk te a lo awm ve thei bawk a. Sum leh pai tam tak sawrkarin a seng si a. Chutiang chu tih bo kan duh. Chuvang chuan Department tin hian an Project duan te chu Planning Board kaltlang zela thehluh tawh tur kan ti a. In ruahmanna te pawh hi rawn thehlut phawt ula, a tul angin kan lo zir dawn nia,” tiin a chah a ni.

He huna tarlan a nih danin kum 1984 atangin Mizoram-ah Drugs hmansual vanga thi 1842 an awm tawh a, an zinga 1616 hi mipa niin midang 226 chu hmeichhia an ni a, kumin 2024 bikah mipa 25 leh hmeichhia 7 an thi tawh bawk. Tunah hian India sawrkar chuan Drugs dona campaign, ‘Nasha Mukt Bharat Abhiyan’ an kalpui mek a, he Awareness Campaign hnuaiah hian India rama District 272 te chu Drugs laka derthawng bik (vulnerable district) a puang a, heng zingah hian Mizoram-a District 6 an tel ve a ni.

He thutkhawm ah hian Excise & Narcotics Department-a Commissioner Z. Lalhmangaiha chuan Chief Minister Lalduhoma chu Chief Minister kan neih tawh te zinga an Office tlawhtu hmasa ber a nih thu sawiin, an lawm thu a sawi a, “Kan hmalakna tur atana thu min chah te pawh kan hrereng a, kan inpuahchah nasa em em a ni,” tiin an mamawh leh harsatna te thlen theia hun tha a pek avangin lawmthu a sawi bawk. Joint Commissioner Peter Zohmingthanga chuan he hunah hian Excise & Narcotics Department dinhmun, an hnathawh dan, an mamawh leh ruahmanna an siam mek te a sawifiah a. Excise & Narcotics Crime & Criminal Management System siam an duh thu te pawh chipchiar takin a sawifiah a ni.

Comments

Popular News (Last 30 Days)

LPG man bithliah thar