Kawlphetha pekna chhia siamthat dan tur sawiho

Cyclone Remal-in Mizoram hmun hrang hranga kawlphetha pekna a tihchhiat te chak taka siamthat a nih theih dan tur chu nimin khan P&E Minister F. Rodingliana hovin Department hotu ten an sawiho.

Nimin chawhnu-a he thutkhawm neih ah hian Cyclone Remal vang hian report dawn chinah Aizawl-ah ringawt pawh Feeder 33 zet chawmtu Power Sub-Station hmun 10 lai chhiat avangin Veng 60 chuang eng nei lovin an awm thu tarlan a ni a, Transformer dahna minin Transformer a minpui tel te leh Panel Board engemaw zat chhia report dawn a ni bawk. Aizawl khawpui chhung bakah Mizoram hmun hrang hrang atanga report dawn danin Mamit District-ah Electric ban leh 33kV line leh 11kV line chhia te, Kolasib District-ah 132kV, 33kV leh 11kV engemaw zat chhia te a awm a, Mizoram chhim lama District 3- Lunglei, Lawngtlai leh Siaha te eng pek theih a la ni lo a. Chhim lam line pekna, Zuangtui leh Serchhip Bukpui inkar-a chhia erawh Siatual (via East Lungdar) atangin power pek tawh niin, hmun dang pawh hetiang hian a theih dan ang anga hma lak zel tum a ni.

He thutkhawm ah hian Minister F. Rodingliana chuan hmanrua indaihlo te hmun hrang hrang atanga lakkhawm dan ngaihtuah a, a tul anga RDSS Scheme atang te pawha hmanrua lo pawh a, a rang lama siamthat hna thawh chhunzawm nan hian sum te pawh a awm ang ang zawn nghal nise a ti a. Hei bakah hianin LT leh HT Line chhia hmun tam takah a awm avangin sum awm lo chung pawh a tihdan kawng zawn zel a ni ang tih a sawi bawk. P&E Department thawktuten ruahsur karah pawh mahni nunna tana hlauhawm khawpa an thawhna ah Minister chuan lawmthu a sawi a, Department lamin theihtawp chhuaha chawl lova hna an thawh thu hre reng chungin, mipuite pawhin dawhthei taka hrethiam turin a ngen a ni.

He thutkhawm hi P&E Minister F. Rodingliana chenna In-ah neih niin H. Zonunsanga, Engineer-in-Chief, P&E Department leh P&E Department Official dang te an tel a, tangkai zawka Customer Care Centre (CCC) hman dan tur pawh sawiho a ni bawk.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result