MBSE in June 19-ah Exam an buatsaih leh dawn

Mizoram Board of School Education chuan June ni 19, 2024 (Nilaini) hian High School Leaving Certificate (Compartmental) Examination, 2024 leh Higher Secondary School Leaving Certificate (Compartmental) Examination, 2024 a buatsaih dawn a, Exam neihna tur hian District tinah Centre pakhat zel ruahman niin Serchhip District-ah pawh Govt. Serchhip Higher Secondary School, Serchhip-ah Exam hi neih tur a ni ang. HSLC leh HSSLC Exam 2024 neih zawh taka zirlai hlawhtlinna changte zingah hmasawn lehzual inbeisei a exam tha leh duh tan an duh ber subject pakhat (theory) ah Improvement Examination an neih phal sak an ni bawk a, Zirlai exam duh tan Centre Superintendent hnenah Fee pe in dilna thehluh theih a ni.

Exam Fee hi HSLC-ah Exam Fee Rs. 300/- bakah Centre Fee Rs. 200/- leh Practical Fee Rs. 150/- a ni anga, HSSLC-ah Exam Fee Rs. 350/- bakah Centre Fee Rs. 250/- leh Practical Fee Rs. 170/- a ni anga, Exam tur nei leh Exam duh te chuan passport size thlalak pakhat (1) leh fee pek ngai zat MBSE in a ruahman nen Centre Superintendent hnena May ni 31, 2024 (Zirtawpni) ralhma in dilna thehluh tur a ni a. Hun bithliah chhunga dilna thehlut hman lo tan Late Fee pe Rs. 500/- pe in June ni 5, 2024 ( Nilaini) thleng ngaihnathiam an ni ang. Exam hi June 19, 2024-ah neih tur niin chawhma lamah Theory leh chawhnu lamah Practical-ah neih tur a ni ang.