Khawzawl-ah HIV/AIDS do dan tur sawihona nei

Khawzawl District AIDS Control and Prevention Committee chu nimin khan thukhawmin HIV/AIDS darh zel tur venna kawnga hmalak dan tur hrang hrang an sawiho.

He thutkhawm Khawzawl DC Meeting Hall-a neih hi an Chairman leh District Bawrhsap K. Lalrohlua chuan kaihruaiin HIV/AIDS chu lang lo lama ram leh hnam min eichhe theitu a nih angin fimkhur a pawimawh thu a sawi a, HIV/AIDS a darh zel lohna turin inzirtirna tha a pawimawh thu pawh sawiin, Sakhaw rawngbawltute chu uar zawka zirtirna kalpui turin a ngen a. District Narco Coordination Center (NCORD)-in ruihhlo chungchang inzirtirna (awareness) an neihna ah HIV/AIDS chungchang zirtirna kalpui thei se thaa a hriat thu leh Social Media kaltlanga campaign neih tam pawimawh a tih thu pawh a sawi bawk.

He thutkhawm ah hian Zuiliani Hrahsel, Joint Director (IEC), MSACS-in powerpoint presentation hmangin HID do kawnga hmalak ngaihna leh hmalak dan turte a sawifiah a. Mizoram State AIDS Control Society (MSACS) tarlan danin Khawzawl District-ah HIV vei mi 616 an awm a, mipui za zel in-test ta se 2.13% chu HIV kai tura ngaih an ni. HIV chu hnam ti mang thei natna a nih angin siamthat lam hawi a ngai a, inven leh inenkawl ngaihpawimawh a tul thu a sawi bawk.