HIV kai ten ART lakna pan hram se duh

Chief Minister Lalduhoma chuan HIV/AIDS vei te tan ART lak chu enkawl nana thil tha ber anih avangin natna tuar mek ten pan hram se an duh thu a sawi.

Positive Women Network Mizoram (PWNM) buatsaih International AIDS Candlelight Memorial Service, 2024 puala nimin-a Mission Veng Presbyterian Kohhran Hall-a hun hman a hmanpuina ah Chief Minister chuan MSACS ten Data an lakkhawm atanga a lan danin Mizoram-ah HIV hrik kai mi 24,864 an awm tawh thu leh an zinga mi 5,021 te an boral tawh thu sawiin, “Tuna he natna tuar mek kan thian te zingah hian tam takin ART tha taka an lak laiin a, la rih lo hi kan la nei nual mai a, chhui zui hleih theih lohva awm pawh an awm,” a ti a. ART Centre hi Mizoram-ah 14 kan nei mek thu leh District Hospital zawng zawng bakah ZMC, Kulikawn Hospital leh Durtlang Hospital-ah te lak theih a nih thu sawiin, “ART lak ngei hi he natna enkawl nana thil tha ber anih avangin natna tuar mek kan thian te hian lo pan hram se kan duh ber a ni,” a ti.

Candlelight Memorial Service hi HIV/AIDS vanga mual min liamsan tawh te kan hriatrengna leh he natna a darh zel lohna tura thawktute chawimawina ni, infuih tharna ni a ni tih Chief Minister chuan sawiin, “Candle (Bati) chu midangten enna an hmuh theih nan a inchhi ral thin a. Keini pawh Bati ang hian midang ten malsawmna an dawn theih nan kan inchhi ral ve anga, he natna lak ata mite an lo him theih nan leh a lo kai palh te pawhin enkawlna tha an dawn theih nan i bei zel ang u,” tiin a sawm a ni.

Comments

Popular News (Last 30 Days)

LPG man bithliah thar