Lung In tang tur leh pawisa chawi turin mi 23 hrem

India leh Bangladesh ramri hungna tur atana sawrkarin mimal ram a laksak a Land Settlement Certificate (LSC) lem hmanga zangna-dawmna la mi 23 te chu lung In tang tur leh pawisa chawi tura hrem an ni.

Prevention of Corruption Act, Special Judge HTC. Lalrinchhana chuan heng mi 23 te hi kar hmasa khan thiamloh chantir an nih thu puang tawhin nimin khan hremna tur a puang a, he thubuai a a meizang hlaptu ber leh Ram Pass dik lo zawng zawng pechhuaktu Ranga Mohan Chakma chu kum li (4) chhung lung In tang tur leh cheng nuai thum chawi tura tih niin a pawisa chawi tur hi a pe theilo a nih chuan thla kua (9) a tan belh anga. Midang 22 te chu kum khat (1) theuh lungin tang tura hrem niin cheng nuai thum theuh an chawi bawk anga, an pawisa chawi tur hi an pe theilo a nih chuan thla kua an tan belh dawn bawk a ni. Police ten an la man theih rih loh Patul Chakma leh Tamanna Chakma te chu dikna-a rorelna hlenchhuah ngei a nih theihna atan bail theihloh manna thupek, hun tiam bik awm lo a man an nih hma atana kenkawh tur a siam bawk a ni.