Skill Competition-ah Mizoram in Medal 8 a la

Tun thla ni 15 atanga New Delhi-ah neih ‘National Skill Competition-Indiaskills:2024’ chu nimin khan zawhfel niin Mizoram atanga tel ten Medal 8 an la.

Yashobhoomi Covention Centre, Dwarka-a neih ‘National Skill Competition-Indiaskills:2024’ ah hian Mizoram atangin Labour, Employment, Skill Development and Entrepreneurship Department hmalakna in Ttrade 16-ah mi 16 tirh an ni a, tun thla ni 16-19 chhung khan intihsiakna neiin nimin khan a kharna leh lawmman semna neih a ni a, Mizoram atanga tel te hian Medal 8 an la a ni. Mizoram atanga tel te zingah hian Maximus Lalruatkima (Floristry); Vanlalbiakdiki (Shoe Making) leh Emily VL. Thakimi (Fashion Technology) te chuan Gold lain Anthony Lalchhanhima chuan Drone Film Making-ah Silver a la a. Laltlanzovi (Hair Dressing); Vanlalhriatchhungi (Beauty Therapy); Liansangrem (Plumbing & Heating) leh Lallawmkima (Electrical Installation) ten Medallion of Excellence (MoE) an hmu bawk a ni.

Ministry of Skill Development (MSDE) hnuaiah NSDC leh Skill India tangkawpin an buatsaih ‘National Skill Competition-Indiaskills:2024’ ah hian State hrang hrang atangin State Winners theuh mi sang khat chuang kalkhawmin Trade 61 hnuaiah intihsiakna an nei a, Mizo thalaite pawh Skill Trade 16 hnuaiah an tel thei a. He intihsiakna a Gold leh Silver dawngte hi kumin September thla a Lyon, France-a Worldskills : 2024 neih turah India aiawhin intihsiakna an hmachhawn leh dawn a ni. 

Mizoram Team-te hi LESDE Department Director Angela Zothanpuii hovin Official mi paruk ten an hruai a. Mizoram hi Indiaskills Competition-ah tum hnih a telna niin kum 2022 khan Medal 2 (Gold leh Bronze) lo la tawhin, kumin hian Medal 8 an la leh thei a. Mizoram Team te hian nimin khan Mizoram rawn thlengin Lengpui Airport-ah anmahni lo lawmna hun hman a ni bawk.

LESDE Minister Lalnghinglova Hmar chuan, India Skills Competition 2024 zawh taka Mizoram tana Medal late chu chhuanawm a tih thu nimin khan Social Media kaltlangin a tarlang a, India Skills Competition 2024-ah Mizoram in Medal 4 leh Medallion of Excellence 4 lai a la thei chu lawmawm a tih thu sawiin, Medal la te a lawmpui thu leh a buaipuitu Department pawh an chhuanawm tih a sawi bawk.