Mizoram-ah raltlan rawn luh belh zelin Myanmar atanga raltlan 35,624 an tling tawh

Myanmar ramchhunga buaina chhuak in ziaawm lam ala pan theih tak tak loh avangin Mizoram-ah raltlan rawn lut an la awm belh zel a, Inrinni thleng khan raltlan rawn lut hi awmin Mizoram pumah Myanmar atanga raltlan mi 35,624 zet an tling tawh nia hriat a ni.

Tunhnaia Myanmar tualchhung buaina chhuak ah Zirtawpni zing atanga zan thleng khan Champhai District-a Zokhawthar khua-ah Myanmar atanga raltlan mi 24 an lut tih Zokhawthar Village Level Committee on Myanmar Refugees hotute chuan an sawi a. Zokhawthar a lutte hi Myanmar rama Khampat, Phulmawi, Tahan, Tuivar leh Hmunlai khua atanga lo lutte an ni a. Zirtawpni zan vek hian raltlan mi 4 te chu Saitual District-a Kawlbem khua-ah an rawn lut bawk a, anni hian he khua a an chhungkhat lainate an bel a ni. Niminpiah, Inrinni khan Zokhawthar khua-ah hian Myanmar atanga raltlan 27 an lo luh belh leh a, raltlan lo lut tam ber hi Chin State hmar lam Tonzang, Cikha leh a chhehvel khua amite an ni a. Tonzang leh a chhehvel hnaiha Myanmar sipai Camp-te chu CNA leh an tanrualpui ‘Mipui Sipai’ invuah pawl hrang hrang 14 tangrualin an laksak tawh a. Sipai tlandarh an umzui laiin Myanmar indo thlawhna te’n Nilaini zan thleng khan helai vel hi a la bomb zui reng ni a thudawn a ni.

Hetihlai hian Tedim leh Tonzang Township chhak lam Tahan leh a bulhnai khua atangin Mizoram-a rawn raltlan an awm ve reng bawk a, heng mite hi Myanmar sipai-in sipai a tan luihtir an tum avang leh chhan dang dang avanga rawn tlanchhia an ni.

Mizoram chhim lamah pawh Maraland Defence Force (MDF) leh Chinland Defence Force (CDF-Mara) te inkara innghirnghona boruak a san vanga Mizoram-a rawn tlanchhia mi 198 an awm bawk a. Anni hi Siaha District-a Laki, Lomasu leh Lopu khua-ah te an inbengbel mek a ni. Chin State chhim lam Paletwa khua leh a chhehvelah pawh Khumi hnamte chu Arakan Army ten an tihduhdah bakah an pawl-a tan luih tir an tum avangin an sahimna zawngin Mizoram-ah an rawn raltlan bawk a. Khumi Hnam hi Zo hnahthlak niin Mizoram-a mi 22 rawn tlanchhia te hi Lunglei District-a Khawmawi khua-ah an awm mek a ni. 

Comments

Popular News (Last 30 Days)

Vawiin-ah HSSLC Exam result

LPG man bithliah thar