Ramri-a nek anga puhna awmzel nei lo niin sawi

Home Secretary H. Lalengmawia'n tunhnai-a Assam Sawrkar-in Mizoram ramri-a Commando Camp an sak chungchangah Assam Chief Minister-in Assam nek anga Mizoram a puh chu thu awmze nei lo a nih thu a sawi.

Nimin-a thuthar lakhawmtu thenkhatin an kawmnaah Home Secretary hian, Mizoram leh Assam ramri buaina chu State pahnih inlungrualna anga siamfel a nih hma loh chuan a tu lam pawhin in nek anga puh a, ‘encroachment’ tih tawngkam hmanga inpuh chu thil awmze nei lo, an pumpelh hram tur a nih thu a sawi a. Tunhnai khan Assam Chief Minister-in Hailakandi District chhung Damcherra khaw bula Commando Camp an sak mekah Ministry of Environment, Forest and Climate Change-a Forest Clearance an dil thu chanchinbu-ah a lan thu leh Commando Camp hi Mizoram lam atanga nekna awm thin tihtawp nana hmalakna a nih thu tarlan a ni tih a sawi a. Commando Camp an sak tan lai hian Forest Conservation (Amendment) Act. 2023 in a sawi angin Forest Clearance an la lo ni-a hriat a ni a, PCCF, MK. Yadava chuan Camp sak phalna hi a lo pe ve ngawt niin a lang a. MK Yadava hi tunah Special Chief Secretary, Forest a ni mek a, hetianga Forest Conservation (Amendment) Act kalha phalna a lo pe ni-a hriat a nih avangin Regional Office, Ministry of Environment, Forest and Climate Change Shillong chuan insawifiah turin a ti hial a, Commando Camp sak mek pawh a tawp tir nghal ni-a hriat a nih thu a sawi a ni.

Home Secretary chuan, Assam hian Nagaland nena an inrina bul Geleky Reserve Forest chhungah kum 2022 khan Commando Camp hi an lo siam tawh tih a sawi a, hei pawh hi Forest Conservation Act hnuaiah dan angin Forest Clearance an dil lo nia a hriat avangin Ministry chuan detail report a dil mek tih a sawi bawk.

Comments

Popular News (Last 30 Days)

LPG man bithliah thar