National Skill Competition - Indiaskills 2024 a Medal la Mizote Chief Minister in a lawmpui

National Skill Competition-Indiaskills 2024-a Mizoram atanga tel Mizo thalai Medal la mi 8 te chu nimin khan Chief Minister Lalduhoma chuan lawmpuina thingpui a inpui.

Chief Minister Pisa-ah heng thalaite lawmpuina hunah hian Chief Minister chuan India rampum huap Skill Competition-a medal la thei Mizo thalaite chu a chhuan thu hrilhin, an kal zelna turah duhsakna a hlan a. Nakinah mahnia production neia hma an lak tak tak dawnah Bana Kaih (Hand Holding) Policy hnuaia thawhpui theih an nih thu a hrilh a. Mizo thalaite zingah thiamna leh theihna hlu tak tak nei an tama a hriat thu sawiin, chung mite zawnchhuah chu a pawimawh hle a, a thiam leh thei te chu sawrkarin Bana Kaih Policy hmanga thawhpui a duh a ni, a ti a. “Chung mite chu Beneficiary kan ti ve dawn lova, Business Partner kan ti thung ang. A thlawna sem lam kalsanin, a hlawhtling ngei tur te thawhpui kan tum a ni. Kumin bikah erawh hi chuan zau takin hma kan la thei dawn rih lova, nakum atang chuan nasa zawka kal theih kan tum a ni,” a ti bawk.

He hunah hian Labour Employment, Skill Development & Entrepreneurship Minister Lalnghinglova Hmar pawhin inbuatsaihna hun an ngah lo chungin lawmman an dawng tha hle tih sawiin, “Tun tum hi he intihsiaknaa lawmman kan lak tam ber kum a ni,” a ti a. Kum 2026-a intihsiakna lo awm leh tur atana inpuahchah a phurawm hle tih sawiin, “Lawmman latute hi kan ITI leh Women Polytechnic-a zirchhuak te an ni hlawm a. Hei hian Mizoram-a kan Institution te thatzia pawh a pholang a ni,” a ti bawk.

Nimin-a heng Medal la te lawmpuina hunah hian Lalmalsawma Pachau IRS, Secretary LESDE leh Angela Zothanpuii, Director LESDE te pawhin thu an sawi a. He hunah hian Medal la te hi sawrkarin lawmpuina sumfai (incentive) pek a tum thu tarlan a ni a. Lawmman latu zinga pahnih te hian International Level intihsiaknaa India ram aiawh turin Vawiin hian Mizoram an chhuahsan anga, National Camp an zawm dawn a ni.