State pawn-a Duty Police ten Vote thlak thei dawn lo

Lok Sabha Inthlanpui neih a State pawn lama venhimna hna thawk tura kal Mizoram Police 1,047 te chuan vote an thlak ve thei dawn lo tih a chiang tawh.

Chief Electoral Officer (CEO) Mizoram Office chuan hemi chungchangah hian Election Commission of India lamin Bihar, Uttar Pradesh leh Madhya Pradesh-a inthlanna a duty Mizoram Police-te chuan vote an thlak a remtih loh thu a tichiang tawh niin an sawi a. Ministry of Home Affairs-in ruahmanna a siam angin Bihar leh Uttar Pradesh-a duty turte hi March ni 28 leh 29 khan an duty-na lam pan turin Rel hmangin an chhuak tawh a. March ni 30 tlai lamah chauh Mizoram Lok Sabha biala ding tur tihchian a nih avangin Postal Ballot hmanga vote an thlak theihna tura an puala Facilicitation Centre siam hman a ni lova. An duty-na tur hmun pana April ni 3-a Rel hmanga chhuak MP a duty turte tana Facilitation Centre siam phalna ECI-a CEO pisa-in a zu dilna pawh April ni 8-ah chauh chhanna hmuh a nih avangin vote thlak lovin an kal ta a ni.

CEO Mizoram Office chuan hemi hnu hian Mizoram Police mi 1,047-te’n an duty-na hmun theuh atang tal a Postal Ballot hmanga vote an thlak phalna an zu dil pawh Mizoram-ah April ni 19-a vote thlak a nih tawh avangin Election Commission chuan a rawn hnawl a, hei vang hian Mizoram atanga State pawn-a Duty tura kal Police te hian Vote an thlak thei dawn ta lo a ni.