Govt. Serchhip College-ah kumin atan Admission tifel 444 awm tawhin 1st Sem-ah 153 an awm tawh

Govt. Serchhip College chuan kumin hian an College-a zir tura Admission tifel mi 444 an awm tawh thu sawiin, 1st Semester-a lut tura Admission tifel chu mi 153 an nih thu an sawi a. Hetihlai hian College Administrative Building sak mek chu a hun taka zawhfel hman an beisei thu hnathawktute chuan an sawi.

Govt. Serchhip College hi nimin khan LENKAWL chuan tlawhin Principal C. Laldintluanga leh a thawhpui ten an dinhmun hrang hrang an lo hrilhfiah a, GSC hotute chuan kumin a HSSLC Exam result a chhuah hnu ah Academic Session thar atan Admission tihna hun hawn a nih tawh thu leh nimin thleng khan Admission tifel hi mi 444 an awm thu sawiin, an zinga 153 te chu 1st Semester zir turte niin 120 chu 3rd Semester zir tur leh midang 171 te chu 5th Semester zir tur an nih thu an sawi a. 1st Semester zir tura Admission ti hi BA-ah 130, B.Sc-ah 14 leh BCA-ah mi 9 niin 3rd Semester zir tur hi BA-ah 98, B.Sc-ah 17 leh BCA-ah mi 5 an ni a. 5th Semester zir tur hi BA-ah 144, B.Sc-ah 21 leh BCA-ah mi 6 an ni thung.

Govt. Serchhip College hotute chuan Serchhip District-ah pawl 12 Arts zirna a awm tak nual avangin BA zir tura Admission tifel pawh an tam thu leh Science zirna erawh a tlem avang leh Serchhip atanga pass zingah pawh khawpui zawka kal tum leh thildang zir tura Coaching kal te an tam thin avangin B.Sc zir tur erawh an ngah lo tih an sawi a. Kumin hian HSSLC-a Distinction-a pass zirlai mi 4 leh Sports Quota atangin zirlai 3 te chu a thlawna Admission tih sak an nih thu pawh sawiin, heng bakah hian mahni line-a titha bik mi pahnih te chu Admission Fee za zela 50-a an tih tlawm sak thu an sawi a. Zirlai naupang College kal tur zingah sum leh pai-a harsatna bik neite tan pawh hma an lak mek thu sawiin, hetiang kawnga harsatna nei te chuan an College Principal emaw, thawktu dangte hnenah emaw in hriattir turin an ngen bawk a ni.


Kumin atana Admission tih theihna hun pangngai chu tawp tawh mah se he College-a Admission ti duh tan la tih theih reng a nih thu College hotute chuan sawiin, amaherawh chu Late Fee erawh chawi ve a tul dawn thu an sawi a. Hmun dang-a kal tum leh thildang zir tum, Seat chang ta lo te zingah Admission rawn ti leh thin an awm avangin zirlai naupang hi an la pun chhoh an inrin thu leh Admission ti duh tan Seat an la pek theih reng thu an sawi bawk. An zirlai Hmei-chhia te tan mi 20 vel awm theihna tur Hostel a awm thu leh mipa pawh mi 30 vel chu Hostel-ah an awm theih thu leh pianphung-a rualbanlo tan pawh Hostel-ah a awm theih thu an sawi a ni.


Govt. Serchhip College Administrative Building sak hna thawh mek pawh a hmunah tlawh nghalin cheng nuai 650 senna tura lungphum lo phum tawh hi ruahmanna thenkhat thlak a nih avang te, a hmun tur laih hmasak a ngaih avang leh Building hlui thenkhat thiata siksawi a tul avangin thawktute chuan thla hmasa (May, 2023) khan hna tan thei chauh ang an nih thu an sawi a. Kum 2 chhunga zawhfel tura ruahman he Building sak hna hi huntiam chhunga thawh zawh hman ngei an inrin thu thawktute chuan sawiin, an hmanraw hman Iron Rod leh Balu te PWD-ah enfiah tir reng a nih thu leh tunah hian an duh anga tha Rora lak tur a van deuh avanga harsatna an tawh thu an sawi bawk.

He building sak hna enkawltute chuan an building sak tur chu ‘L Shape’ tur a nih thu sawiin, tunah hian a lane khat tur a ban an phun mek thu an sawi a, hei hi sa chhunzawm zelin a hnuailam hi luah lailawk theiha peihfel a nih veleh tuna College Office ho insawnlutin a lehlam chu sak leh tura ruahman a ni tih an sawi a. Chhun leh zan-a hna thawk tura ruahmanna an siam thu an sawi bawk.

Govt. Serchhip College-ah hian tun dinhmunah thawktu Teaching Staff mi 51 awm mekin Regular mi 27, Contract mi 10, Part Time 5, RUSA 4 bakah Casual mi 5 an ni a, Non-Teaching Staff mi 16 an awm bawk.

Comments

Popular News (Last 30 Days)

LPG man bithliah thar