Aizawl khawpui-ah Project 40 chuang kalpui mek

Smart City Mission hnuaiah Aizawl khawpui thuam mawi-a tih changkan nan tun dinhmunah Project-40 chuang kalpui mek a ni.

Smart City Mission kum 8 tlin lawm nana Aizawl Smart City Limited leh Mizoram Cycling Association tangkawpin Inrinni zing-a Cyclothon an buatsaih a vailiamna hunah UD&PA Department changtu Deputy Chief Minister Tawnluia chuan he thu hi sawiin, Smart City Mission chu kum 8 kalta khan India ram Prime Minister Narendra Modi-a’n a hawn thu leh India ram puma khawpui 100 thlanchhuah ah kalpui a nih thu a sawi a. Khawpui tih changtlun leh tihchangkan chu he Mission tùm ber a nih thu sawiin, Smart City hnuaia khawpui thlanchhuah zinga tel tur chuan tehfung hrang hrang a awm thu leh Mizoram pawh chung tehfung a zawhfel hnuah kum 2018 khan pawm a nih thu a sawi a. Covid hripuiin kum 2 chhung a thutchilh avangin hmalakna te duh angin chak lovin tithuanawp deuh mahse Aizawl khawpui thuam mawi a tihchangkan nan tun dinhmun ah Project 40 chuang kalpui mek a ni tih a sawi a. Smart City hnuaia hmalakna te chu kum 5 chhunga zawhfel tur tih a nih laiin Covid avangin kum khat dang pawhsei niin nakum-a zawhfel hman tumin nasa takin an kalpui mek a nih thu a sawi bawk.

Deputy Chief Minister Tawnluia chuan Smart City Project hnuaiah thalaite hmakhua ngaiin an hawiharhna tur leh khawvel zau zawk an thlirna tur project hrang hrang kalpui mek a nih thu a sawi a. Thalaite changkanna leh hmasawnna tur atan nasa taka thawh mek a ni tiin he Project hnuaia sak Playground, Information Kiosk leh intihhlimna hrang hrangte chu dimdawi a, neitu rilru pu theuh turin kalkhawmte a chah bawk.