Health Minister in Siaha-ah PICU leh HDU a hawng

District Hospital Siaha-a Paediatric Intensive Care Unit (PICU) leh High Dependency Unit (HDU) chu Inrinni khan Health Minister Dr. R. Lalthangliana chuan a hawng.

Health Minister chuan Covid hripui leng leh harsatna hrang hrangte avangin kum 2 chuang hna thawk tha hlei thei lova an awm thu sawiin, Mizoram Health Systems Strengthening Project (MHSSP) hnuaiah District Hospital Siaha pawh cheng nuai 276.7 senga thuamthat tum a nih thu a sawi a. He project hnuaiah hian Mortuary Room sak te, Administrative Building, OPD building,Trauma Centre, Main Building rawng hnawih leh hmun pawimawh laia CCTV vuah bakah hna dang thawh tur niin July thla laihawl vel atang chuan hna pawh thawh tan theih beisei a ni thu a sawi bawk.

Minister in a hawn tak Paediatric ICU-ah hian khum 4 leh HDU-ah khum 8 sawmin, heng Unit 2 te hi khawl leh hmanrua hrang hrang chi 16 a thuam a ni bawk.