C. Zopari hnenah Nurse chawimawina hlan

Ramchhunga Nurse hnathawh tha te chawimawina sang ber, National Florence Nightingale Award chu Aizawl Dinthar Veng-a cheng C. Zopari, Ward Superintendent (Retired) hnenah hlan a ni.

National Florence Nightingale Award hi nimin khan New Delhi-a Rashtrapati Bhavan-ah President Droupadi Murmu chuan a hlan a, India ram State hrang hrang atangin Nurse hnathawk tha leh chawimawi tlak te hnenah chawimawina hi hlan niin kum 2022 atan mi 15 te hnenah leh kum 2023 atan mi 15 te hnenah hlan an ni a, kum 2023-a chawimawina dawng zingah hian Mizoram atangin C. Zopari hi a tel a ni.

C.Zopari hian kum 1985-ah School of Nursing, Civil Hospital Aizawl atangin General Nursing and Midwifery (GNM) a zir zo a. Kum 1986 atangin Staff Nurse hna thawk tanin Mizoram hmun hrang hrang- Buarpui PHC, Chhingchhip PHC, District Hospital Siaha leh Civil Hospital Aizawl-ah te hna a thawk a. Kum 2016 August thla ah Ward Superintendent-ah kaisangin, District Hospital Kolasib leh Civil Hospital Aizawl-ah kum 37 chhung rinawm taka a thawh hnuin kumin March ni 31-ah Superannuation pension in a chhuak a ni. C. Zopari hian heng Health Centre hrang hranga thawh chhung hian mi engemaw zat nunna a chhanhim a, heng nunna a chhanhim sak leh a hnathawh that dangte avangin nimin khan India rama Nurse chawimawina sang ber National Florence Nightingale Award 2023 hi India President in a hlan ta a ni.