Khua leh tui tha tan Mizoram hmun him a ni - CM

Chief Minister Zoramthanga chuan khua leh tui tha tute tan pawh Mizoram chu hmun him a nih thu sawiin, Manipur, Myanmar leh Bangladesh atanga sahimna zawnga Mizoram-a rawn raltlan mi 50,000 chuang an awm mek thu a sawi.

Nimin-a Instagram lama a tarlan danin Chief Minister Zoramthanga chuan tun dinhmunah Manipur buaina chhuak avanga sahimna zawnga Mizoram Inpui rawn beltute chu mi 11,785 an tling tawh a, Mizoram Sawrkar chuan Manipur buainaa awm Zofate tan leh Mizoram chhunga sahimna zawnga rawn lutte tan Buhfai Quintal 2388.50 lai a pe chhuak tawh tih tarlangin, an awmna tur leh an mamawh dangte pek an ni bawk tih a tarlang a. Kan thenawm Manipur, Myanmar leh Bangladesh atanga sahimna zawnga Mizoram rawn beltu Mizoram Sawrkarin a lo tuamhlawm leh enkawl mekte hi an vaiin mi 50,000 (singnga) chuang an awm mek thu a tarlang bawk a ni.

Mizoram chu Zofate Inpui a ni reng dawn tih pawh Chief Minister chuan tarlangin, “Manipur buaina avangin Mizoram-a cheng Meitei te an him loh phah lo a, hlauhthawnna tur a awm hek lo; khua leh tui tha tute tan pawh hmun him a ni. Mizoram ang bawkin Manipur pawh kan unau Zofa zawng zawngte tan hmun him ni ve se tih hi kan duh dan a ni,” a ti a. “Mihring mihrinna thinlung atang pawhin kan neih leh kan tih theih tam lo mahse, sahimna zawnga Mizoram rawn beltute lo tuamhlawm leh kan neih ang ang lo pek ve hi kan duh dan pawh a ni,” a ti bawk.