MPCC in Thutiam tih hlawhtlin loh pali an puang

Mizoram Pradesh Congress Committee (MPCC) chuan Zirtawpni khan Aizawl Press Club-ah chanchinbumite kawmin MNF party chuan mipui hnena an thutiam tihhlawhtlin theih loh langsar pali (4) an nei tih an sawi.

MPCC Media Department Chairman Dr. Lalianchhunga chuan, “December 15, 2018 atanga MNF sawrkar thar a pian atangin kum ngana kan hmang mek a. Inthlan nan thla nga emaw chauh a awm tawh laiin an thutiam tihhlawhtlin loh pali an nei a ni,” a ti a. An tihhlawhtlin loh a sawite chu MNF President-in sawrkar hunah vai buhfai an rin tawh loh tur thu leh Mizo buh an rin zawk tawh tur thu a sawi te, Traffic Jam awm lohna khawpui, kawng chhawng leh SEDP-ah nuai 3 sem te an ni tih a sawi. 

Dr. Lalianchhunga chuan,, “MNF sawrkar chhungin zeldin thu leh insawi hlim chawpin hun an hmang tluan a. Mipui tan hamthatna leh hmasawnna awm si lovin an duhsakte nen rem leh rem lo pawh thlu lovin an chawm a, an hawp a. Hetianga ram mipui an zahna leh an pawisak lohzia thlir hian Mizoram in anmahni avanga harsatna kan tawh zel lohna tur leh kan ram, kan hnam, kan Sakhua a him zel nan Central-a BJP sawrkar thawhpuitu, MNF hi hnawl turin Mizoram mipui kan ngen a. Enchhin ngai lo, kut fai, mi rinawm leh Pathian tih mi, Lalsawta hova sawrkar tha siam turin Mizoram mipui kan sawm che u a ni,” a ti bawk.