Hnahthial-ah PWD Division Office thar Chief Minister in a hawng

Public Works Department (PWD) changtu Chief Minister Zoramthanga chuan Executive Engineer thuthmun tur PWD Division Office chu nimin khan Hnahthial-ah a hawng.

Chief Minister hian Hnahthial-a PWD IB thin, tuna EE Office ni ta ah PWD Division thar hawnna lungphun hawngin, Hnahthial Electric Veng Community Hall-ah inkhawm neih zui ah District a lo phuisui zawk theihna tura hlawhtling taka hmalakna chu lawmawm a tih thu a sawi a, mipui mamawhna leh mipui rawngbawl kawngah hmasawnna nasa zawk a thlen ngei a beisei thu a sawi bakah ram inrelbawlna tha zawk a thlen theih nana District siam belh a nih dan leh thuamthatna tura hmalakna te a sawi bawk. Chief Minister chuan sawrkarin a hmachhawp te tihlawhtling tura theihtawp a chhuah thu sawiin, tikhaihlaktu harsatna hrang hrang awm chung pawhin hmasawnna tam tak hmuh tur a awm thu leh neitu rilru pu a, hnam hmangaihna nen chuan hmalakna tha siam zel a pawimawh thu a sawi a. Mizoram chu hnamdang laka zahawma a awm theih nan leh Mizo kan nihna zahpuiawm a nih lohna turin malsawmna haichhuah tur a awm tih hria a ram hmangaihna nen hma lak ho puiah mipui leh thalai pungkhawmte chu a sawm bawk a ni.

He hunah hian khual zahawm, Health Minister leh bialtu MLA Dr. R. Lalthangliana chuan District ah hmasawnna nasa tak hmuh belh zel a ni chu lawmawm a tih thu sawiin, Kum 2019-a District pariat awm sa bakah pathum puan belh a nih dan te leh thuamtha a tiphuisui tura sawrkarin chak taka hma a lak zui dan te a sawi a. Harsatna tam tak kara District tan sawrkarin hma a lak dan hrang hrangte sawiin, tun dinhmunah Hnahthial-ah chuan District Office hrang hrang siama hawn a nih tawh bakah tunhnai maia hawn hmabak pawh an awm thu a sawi bawk.

National Highway Division-IV ni-a Chhim lama National Highway hrang hrang enkawl hna thawk thin chu NHIDCL te lo luh hnuah hna chanpual te pawh thlak danglamin Lunglei Road Division-II ah leh a ni a, hei hi tunah chuan PWD Hnahthial Division tih ni tain he Office-ah hian EE pakhat, SDO pathum leh Staff dangte an awm dawn a ni. Nimin-a PWD Division thar hawnna hun hi Hnahthial DC R. Lalremsanga chuan kaihruaiin PWD Chief Engineer (Roads) Er. Vanlalchhuana chuan lawmthu sawiin hun a hmang bawk a ni.