Unity Mall sakna atana remchan theih dan tur en

Nimin zing khan Chief Minister Zoramthanga hovin Zuangtui a FCS&CA Kudam chu Unity Mall sakna atana a remchan theih dan tur thlithlai a ni.

FCS&CA Godown hi Sairang Dinthar Veng-ah sawn tura hmalakna kal mek niin, niminpiah khan Kudam thar hi a sakna tur lungphum phum a ni tawh a, sak zawh a nih hunah Zuangtui-a Supplies Department ram hi mipui tana tangkai thei ang bera hman tum niin nimin zing khan Chief Minister leh Tourism Minister Robert Romawia Royte hovin sawrkar department hotu pawimawh thenkhat leh khawtlang hruaitute chuan Unity Mall sakna atana a remchan theih dan tur hi an thlithlai a ni.

‘Unity Mall’ chungchang hi kumin February thla khan Union Budget Session ah Union Finance Minister chuan sawiin, Tourism leh mahni kutkawih a eizawngte hmasawnna tur atan leh inpumkhatna atan State tin te an Capital ah din tum tura tih an nih thu a lo sawi tawh a. Unity Mall hi State tin te an State nihna leh ziarang phochhuak tha thei ber tur thil siamchhuah/tharchhuah (One District, One Product) te, GI product te leh handicraft thilte chawilar nana tih niin, Mall tinah hian mahni State mai bakah ramchhung State dangte thilsiamchhuah theuh pawh pholan ve tur a ni a. Sawrkar laipui chuan a sakna tur cheng vbc. 120 chuang a dah a ni.