Manipur-a Zofate himna sawi loh zahthlak an ti

Congress Party Thalaite chuan tunhnaia Manipur leh Mizoram Chief Minister te inbiakna ah Mizoram Chief Minister in Manipur-a Zofate himna lam a sawi ri lo chu zahthlak an tih thu leh pawi an tih thu an sawi.

Nimin-a thuchhuah an siamah MPYCC chuan June ni 18, 2023-a CM Instagram lama thu puanzarah State pahnih Chief Minister inbiakna ah Manipur-a Zohnahthlak himna sawi lan a ni lo tih tarlangin, “Manipur CM erawhin Mizoram-a Meiteite himna sawipuiin, Pu Zoramthanga hian an himna pek a tiam mai bakah Manipur leh Central Sawrkar hmalakna chu thlir reng chungin an hmalakna te a thlawp thu tarlan a ni,” an ti.

MPYCC thuchhuah chuan Manipur dinhmun dik tak khawvel hmuha pholan a nih mêk avangin Zohnahthlakte laka Meitei chetna dik lo tak puanzar a ni chho zel nia sawiin, “Hetih laia kan CM thu leh hla tlanchhe aw tak mai hian mangangte a thlamuan lo a ni,” an ti a. “Meitei thalai ten Assam ram thlenga Mizoram châk lakluhna dan pina min vau laia, mahni State leh Zofate thlavang hauhna pakhat pawh kan CM-in a chhak chhuak ve lo hi demawm kan ti takzet,” an ti bawk a ni.