ZPM Thalai ten Lokayukta-ah complaint an thehlut

ZPM Thalaite chuan Aizawl South-I Bial huamchhunga SASCE atanga hna hlawm pathum chhuak an zirchianna-ah thil dik lo a awm nia ngaiin nimin khan Mizoram Lokayukta-ah complaint an thehlut.

ZPM Thalaite chuan Lokayukta-a complaint an thehluhah, Aizawl South-I Constituency huamchhungah hian SASCE hnuaiah hna hlawm hrang hrang pathum a awm thu leh chung zawng zawng sanction amount chu cheng vbc. 8.11 niin hna hrang hrangah thensawm a nih thu an tarlang a. Heng hnathawh kalpui danah hian thil fel lo tam tak a awm nia an hriat thu tarlangin, “Chung zingah chuan a Project nena inmil lo hna tam tak a awm a, a taka hmuh tur awm lo hna sanction a awm ni a hriat a ni bawk. Chung zinga kan hriat theih chu Construction of Concrete Pavement on College Veng Field to PUC to Bethlehem Vengthlang Kawn a ni,” tiin he thil hi khawtlang hruaitute pawhin a hna thawhna hmun an hre lo niin an sawi.

ZPM Thalaite chuan hna hi a thawktu tura ruahman PWD-in thawk loin, MNF party Worker-te induhsakna atan hman nia an hriat thu pawh tarlangin, “Hei hi dan bawhchhiatna a ni,” an ti a. SASCE chu ram hmasawnna hna rotling tak thawhna tura ruahman a nih laiin, sum siamna atan mai maia hman nia an hriat thu an sawi bawk.