Congress Party in mi thar lawmluhna hun an hmang

Mizoram Pradesh Congress Committee (MPCC) chuan nimin khan Aizawl khawpui chhunga Congress party intuaitharna leh mi thar lawmluhna hun hmangin an party zawm thar hi langsar tak tak lawmluh an ni.

Aizawl Vanapa Hall-a nimin-a he hun hmanna ah hian MPCC President Lalsawta chuan Pathian in Congress party a hruai thin tih sawiin, “Ram enkawl chungchangah sawrkar tha a pawimawh. Mizoram in harsatna kan tawhin Mizo zia a lo lang thin. Hripui len lai pawhin chhim leh hmar a mite'n kan tlakchham hlauvin midang harsatna pui tur te, an mamawh phuhruk turin an inpe a, mi tam tak mamawh chhanna an ni a, mi mangang tanpuitu an ni. Mipui leh ram tha Pathian in min pe a, sawrkar tha siam turin kan thei a, kan tlin, chu chu Congress party in kan tum a ni,” a ti.

MPCC President chuan Election Commission of India in inthlan ah MLA Candidate te sum hman tur a ruahman thu leh Kohhran in sum seng lo tura a ngen bawk thu sawiin, “Inthlanna thianghlim leh tha nei turin min vil dawn. Sum seng tam ten sawrkar huna mipui sum an lak then leh tur ni lovin, keini chuan sum ni lovin Pathian lam kan hawi a ni. Kan sawrkar leh kar loh chu Pathian thu thu a ni,” a ti a. Party thenkhat chu inthlan behbawmah an lung ti muangtu chu sum a nih thu sawiin, “Keini chuan sum kan nei lo, Candidate-te mi hausa ni lo mahse mi tha, mi dik leh rintlak an ni dawn. Mizoram tana sawrkar tha siam turin Pathian lam kan hawi a. Keini hi mahni aia ram dah hmasa turin Pathian in min ko a ni tih i hria ang u,” a ti a, “Keimahni ngeiin kan ram hi kan siam dawn a, nakin atan kan nghakin kan dah thei lo, tunah a ni kan tih dawn. Kan tihphung pangngai hian kan ram hi a danglam dawn lo, tih danglam a ngai,” tiin ram tana danglamna siam tura an lo kal thu a sawi a ni.

MPCC thuchhuah in a tarlan danin nimin-a an party zawm thar an lawmluh zingah hian Lalnunmawia Chuaungo IAS (Rtd); Lalbiakzama MPS (Rtd); F. Laldingliana MCS (Rtd); Vanneihthanga Vanchhawng (Journalist); Lalremruata Renthlei (News Editor, The Aizawl Post); Eric F. Zomuanpuia (G/S Chhimbial Chhantu); Lalchhunga (LC Sofa); Laldingngheta (Advocate), Lalnilawmi (Former Chief Manager, SBI), Merium L. Hrangchal (Vestige) leh Block huamchhung Unit hrang hrang atangin mi 772 an ni.

Nimin-a lawmluh thar zinga mi Chief Secretary lo ni tawh Lalnunmawia Chuaungo chuan State dangah hun rei tak hnathawkin an awm thu sawiin, State danga an thil tih tha Mizorama tih theih a awm ve-a a hriat thu a sawi a. “Thil zawng zawng chu tih theih loh mahse, thil tha engemaw zat chu Mizoram tan a tih ve theih dawn niin ka hria a. Chuvangin, politics ah ka rawn zuang lut a ni,” aa ti bawk.

Comments

Popular News (Last 30 Days)

Bawngchawm tlang khualbuk rawktu nia hriat mi 2 man