Mizoram-a Raltlan awm mekte puihna tur sum pek phalna Home Ministry-in an rawt angin pe dawn

Union Finance Secretary Dr. TV. Somanathan chuan Mizoram-a Raltlan awm mekte puihna tur sum pek phalna chu Home Ministry-in an rawt angin pek nghal a nih tur thu a sawi.

New Delhi-a cham mek Mizoram sawrkar-a Tourism Minister Robert Romawia Royte chuan niminpiah tlai khan Union Finance Secretary Dr. TV. Somanathan chu a Pisa-ah kawmin Manipur buaina vanga an sahimna zawnga Mizoram-a raltlante dinhmun leh mamawhte a sawipui a. Hemi hmalam hian raltlante chungchanga Nodal Ministry ber Home Ministry-a Secretary, Ajay Kumar Bhalla leh Additional Secretary pahnihte a sawipui tawh tih sawiin, Home Ministry-in State ramri kan-a raltlante enkawlna turin Scheme hranpa a neih loh avangin Finance Ministry chu Home Ministry hnenah ngaihhnathiamna pe vat turin a ngen a. Union Finance Secretary chuan Mizoram-a Raltlan awm mekte puihna tur sum pek phalna chu Home Ministry-in an rawn rawt angin pek nghal a nih tur thu in Tourism Minister hi a lo thlah a. Tourism Minister chuan Union Home Secretary Ajay Bhalla pawh Telephone-a biain Union Finance Secretary thuchah chu a hrilh nghal a ni.

Union Finance Secretary Dr. TV. Somanathan chuan Mizoram Chief Minister Zoramthanga’n Union Finance Minister Nirmala Sitharaman hnena a rawt angin SASCI Part-I 2023-24 atangin Cheng nuai 20000 Additional Finance Ministry-in Mizoram a pek belh tur thu Tourism Minister hi a lo hrilh bawk a. Minister chuan SASCI sum chu release rang tura ngenin, Union Finance Secretary chuan hun reilote ah release a nih tur thu a sawi bawk a ni.

Minister Robert Romawia Royte hian Niti Ayog hotute pawh kawmin Mizorama Aspirational District, Mamit tihhmasawn dan tur a sawipui a. Union Sports Secretary Sujata Chaturvedi pawh kawmin Mizoram tana projects SAI-in a recommend tawhte sanction rang tura ngenin, SAI leh Khelo India Centres thar tur rawt belhna a thlen nghal a ni. Hei bakah hian DC&MA changtu ni bawk Robert Romawia Royte hian Minority Affairs Ministry hotute pawh kawmin Mizoram chu PMJVK Scheme kalpui tha ber nia a hriat thu leh a hmuna hnathawh hrang hrangte rawn endik turin a sawm a. Sum pekchhuah tur awm ang angte pechhuak vat turin a ngen a ni.

Robert Romawia Royte bakah amah tawiawmtu MLA pahnih Dr. K. Pachhunga leh Er. H. Lalzirliana te hian Union Minister of Earth Science Kiren Rijijju pawh Manipur buaina chungchang hi khunkhan takin an sawipui a, Central sawrkarin Mizoram-a raltlante tanpuina a pe mai lo chu pawi an tih thute hrilhin, Manipur buaina chungchangah Prime Minister chu inrawlh vat tura an duhthu te an hrilh a, NE tana Union Minister a nih ang takin a theihna zawnah tan la turin an ngen bawk a ni.