MYC Coaching atanga zirchhuak mi 141 ten sawrkar hna an hmu tawh - MYC Chairman

Mizoram Youth Commission (MYC) Coaching atanga zirchhuak mi 141 ten sawrkar hna an hmu tawh tih MYC Chairman Dr. Vanlaltanpuia chuan sawiin, MYC chuan beidawng lovin thalaite tan a pen zel tih a sawi bawk.

MNF Party in Mizo Hnam Run-a Chhung Inkhawm nimin-a an neih ah MNF Adviser leh MYC Chairman Dr. Vanlaltanpuia MLA chuan MYC hmalakna te tarlangin, MYC in thalai hna zawng laite tan Coaching Class a kalpui reng tih sawiin, kum 2018-22 inkarah khan MYC Coaching atanga zirchhuak mi 141 ten sawrkar hna an hmu tawh tih a sawi a. Heng bakah hian Bank a thawk turin mi 38 an lut tawh a, Private Company leh Insurance company ang chi-ah mi 42 an lut tawh tih sawiin, CIJW Vairengte nen MoU an ziah tawh thu a sawi a. MYC chuan Sipai lak runpui-ah thalai, sipai-a tang duh an buaipui a, MYC Coaching kaltlanga sipai-a lut hi 70 chuang an ni tawh tih a sawi bawk.

MYC Chairman chuan June ni 12-a UPSC result chhuakah Mizoram atangin thalai 5 ten Prelims an inziak tling tih pawh sawiin, “Heng te hi MYC in theihtawp chhuaha a hmalakna rah kan hmuh mek niin kan hria a, Vawi leh khata rahchhuak hmuh nghal theih chi a ni lo tih hria ila,” tiin nu leh pate pawhin fate tan kum khat na na na chu ran, lirthei leh rosum tiral phalin fate buaipui turin a ngen a; MYC chuan beidawng lovin thalaite tan a pen zel a, nakin lawkah rahchhuak tha kan hmu ngei ang, a ti bawk.

Covid hrileng avanga State danga hnathawkte chu Supreme Court in ‘An Home State-ah haw se, State sawrkarin chhawmdawlna pe rawh se’ tiin order a chhuah tih pawh MYC Chairman chuan sawiin, “Covid avanga State danga hnathawk lokir lehte tanpui nan Chief Minister in vbc. 6 min pe a, hemi sum hian kan thalaite tanpuina kan pe ta a, Covid kian hnuah an thawhna lamah an let leh tawh hlawm a ni,” a ti a. Covid hrilen laiin MYC chuan thalaite tan eizawnna inkawhhmuhna tha 'Hna Inpui.com' a siam thu leh North Eastern Council chuan Hmarchhak pumpui tana hman turin an dil tih sawiin, MYC chuan hman phalna a pe a, NEC chuan lawmthu sawi nan MYC hnenah Vbc. 3 a pe a hial tih a sawi bawk. Hei bakah hian  MYC Chairman chuan, Covid lai khan MYC chuan building thar pahnih a sa zo tih pawh sawiin, Lunglei-ah vbc. 4 man sak zawh anih thu leh Serchhip-ah cheng vbc. 3 in MYC Pisa thar sak a nih thu a sawi a, hei hi hawn thuai a ni dawn tih a sawi bawk.