Mizoram Legislative Assembly Golden Jubilee lawmna kum khat chhung neih kharna neih a ni

Mizoram Legislative Assembly kum 50 tlinna, Golden Jubilee lawmna kum khat chhung neih kharna chu nimin khan Assembly Conference Hall, Annexe building-ah neih a ni.

Mizoram Legislative Assembly kum 50 tlin lawmna kharna hun hi Deputy Chief Minister Tawnluia chuan hmanpuiin ram hruaitu hmasaten bul an lo tan tawhna chu fakin, an kawng tuaihnum sa vawng nung zel tur leh an thawhrimna te chu hre reng turin Vawiin-a roreltu (legislator) te chu a chah a. Mizoram Legislative Assembly chu zahawm leh entawntlak taka rorelna hmun leh sawihona hmun ni fo thin tih sawiin, “State dangte nen khaikhinin a felfaiin boruak a tha thin hle a, anmahni thlang tlingtute zahawmna an hum hle a ni,” a ti a, hei hi lawmawm a tih thu a sawi bakah chhawm nung zel turin a chah bawk a. Mipuite pawhin rorel tura an thlantlinte chu dik tak leh rinawm taka hna an thawh theih nan thawhpui thiam turin a ngen bawk.

He hunah hian Deputy Speaker H. Biakzaua chuan Mizoram UT leh State a nih chhoh dan tarlangin, Hnam anga inlungrualna leh inpumkhatna a pian theihna tur leh inenkawlna hranpa neih theih nana hmalatute an fakawm hle a ni, a ti a. Minister Dr. R. Lalthangliana pawhin an hun chhung ngeia ‘Golden Jubilee’ lawm a ni chu a vanneihthlak hle tih sawiin, Speaker tam tak a lo hrawn tawhte chu sawiselna tur a hriat loh thu a sawi bakah zahawm taka House an lo kalpui thinna ah zahna chibai a buk a. Former Legislators’ Association of Mizoram (FLAM)-a President Liansuama pawhin Mizoram sawrkarin MLA lo ni tawhte duhsak taka a tuamhlawm thinna ah lawmthu a sawi a. Tun dinhmunah Ex-MLA mi 59 an awm thu leh Member boral tawh nupuite chu Associate Member-a an lakluh thin thu sawiin, an vaiin member 154 an awm mek thu a sawi bawk.

Mizoram Legislative Assembly kum 50 tlin lawmna hun kharna ah hian Mizoram Speaker Lalrinliana Sailo chuan lawmthu sawiin, hruaitu hmasate leh Dan siam tura thlantlin MLA-te chhe lailet der leh thil tha tih reng reng nei lo anga sawi thin chu pawi a tih thu sawiin, kum 1972 atanga Vawiin thlenga MLA lo ni tawh zawng zawng chu mi 232 an nih thu leh ram tana thawk tha leh sulhnu ropui tak tak neite vek an ni, a ti a. Zirlaite tana hlawkna a nih beiseiin kumin atang chuan Assembly House chu zirlaite tlawh theiha hawn a nih tawh tur thu a sawi bawk.

Mizoram Legislative Assembly kum 50 tlin lawmna hi March ni 11, 2022 khan a sawihawnna hun hmanga tan a ni a, Thupui hrang hrang hmanga sawihona te, College zirlaite tana Parliament lemchan intihsiakna te, Golden Jubilee pual Exhibition leh Special Session te neiin a lawmna pui ber chu May ni 9, 2022 khan hman a ni bawk.