Serchhip Bialtu MLA in Buangpui-ah MLA Fund hmanga sak MUP Run a hawng

Serchhip bialtu MLA Lalduhoma chuan Zirtawpni khan a bial chhung Buangpui khua ah MLA Fund atanga sak MUP Run hawngin, MLA Fund chu dik tak zela hman a nih chuan a daihzai em em thin tih a sawi a. Corruption dona ah kan tanrual a pawimawh thu a sawi bawk.

MLA Fund hmanga sak Buangpui khuaa Mizoram Upa Pawl (MUP) Rûn hawnna hun Zirtawpni kalta (June 16, 2023)-a neih ah hian Serchhip bialtu MLA Lalduhoma chuan an bial chu kum 20 zet Chief Minister Bial an lo nih tawh hnu hian hmasawnna tam tak chu awm mah se, chhunzawm tur hi a lo tam hle tih a sawi a, “A bikin Rûn kan tih ang hi nei mumal bar hi kan lo awm lo. Serchhip, Thenzawl, Buangpui leh Neihloh lam te thleng hian,” tiin, heti lam hawi pawh hian MLA Fund an hmang hnem malh malh tawh hle tih a sawi a. MLA Fund hmangtu NGO te pawhin an hmang tha hle nia sawiin, lawmawm a tih thu a sawi bawk.

MLA Fund chu mipui sum a nih angin mipuiten dik takin an hman zel tur thu sawiin bialtu MLA Lalduhoma chuan, “Sum tam tak awm lo mah se, a awm chhun chhun kan hman dik chuan hna tam tak a thawh theih a ni,” a ti a. Kohhran sum te dik takin kan hmang a, a daihzai thin tih sawiin, MLA Fund pawh dik tak zela kan hman chuan a daihzai em em thin tih a sawi a ni.

Corruption chungchang sawiin Lalduhoma chuan, “Kan ram hian eirukna hi hua ila, do ila, kan sum tlemte hmang pawh hian hna tam tak a thawh theih. Corruption a lo bo theih nan chuan chhungkua atang pawhin kan tan thei,” tiin “Naupang ten kan nu leh pa, kan u leh nau ten an hlawh bak sum tam tak rawn hawn thei chhungkua kan neih chuan hetiang hi rawn ti tawh suh tih nachang hria ula, nu leh pa, pi leh pu te pawhin kan tu leh faten sum thianghlim lo an lo hawn thin a nih chuan lo hnawl ngam rawh u,” a ti bawk.

Buangpui-a MUP Run hawnna hun hi MUP Buangpui Branch President Rokhawma chuan kaihruaiin YMA hruaitute pawhin thu an sawi a. MUP Run hi MLA Fund Rs. 1,50,000/- senga sak niin a chung hi Buangpui VC ten Mini Hall atan an sa chhunzawm a ni.