CSS nawrhna titawp lailawk

Mizoram-a Centrally Sponsored Scheme (CSS) hnuaia thawktu pawl hrang hrang ten an thilphut nawr nana nimin atanga hnathawk lova lungawi lohna an lantir chu Chief Minister hova inbiakna an neih hnuah an titawp lailawk.

Mizoram-a CSS hnathawk inzawmkhawmna, All Mizoram CSS Employees Co-ordination Committee hian Study Group rawtna anga hamthatna siamsak tura sawrkar nawr nan tun thla ni 20 atanga ni 22 chhung khan Badge dum bel chungin hna an thawk a. An thilphut chungchangah hian an beisei anga Sawrkar atanga thu lawmawm an dawn loh avangin nimin atanga hnathawk lova lungawi lohna lantir chhunzawm an rel angin nimin khan hna an thawk lo a. An thilphut chungchang hi nimin khan Chief Minister Zoramthanga hovin an sawiho a, hemi hnu hian Chanmari YMA Hall-ah CSS pawl hrang hrangte chuan an kal zel dan tur ngaihtuahin an thukhawm chhunzawm a ni.

Hemi hnua thuchhuah an siamah All Mizo-ram CSS Employees Co-ordination Committee chuan, Chief Minister hova an thutkhawmna ah hian an thilphut Sawrkar-a a nghet-a luh te, CSS hnathawkte tan Medical Reimbursement an neih ve theihna tur bakah Recruitment Rules tha tak siam chungchangte an sawiho tih an tarlang a. An inbiaknaah hian Chief Minister chuan, Regularization Scheme siam sak bakah Sawrkar hna nghet lakah CSS a thawkte tan Reservation siam sak tur leh Recruitment Rules tha tak siam sak turin July thla chhungin Cabinet Meeting-ah ngaihtuah a, tihhlawhtlin sak ngei a tiam avangin hnathawk lova lungawi lohna an lantir chu tih-tawp lailawk nghal an remti tih an tarlang.

All Mizoram CSS Employees Co-ordination Committee chuan Mizoram Chief Minister-in a tiam te hi Cabinet Meeting-in an pawm sak lo a nih chuan an awm dan tur ngaihtuah that leh a ni ang tih an tarlang bawk.