Kel vulhtu pawl ten Assembly neiin hruaitu an thlang

Serchhip-a Kel vulhtu pawl tia hriat, Serchhip Livestock Farmers’ Cooperative Society chuan nimin khan Assembly neiin hruaitu thlanna an nei.
Serchhip Livestock Farmers’ Cooperative Society Assembly PC. Siamliana In-a neih hi an Vice Chairman Lalthlanthanga chuan kaihruaiin an pawl hmalakna leh sum dinhmun te ngaihthlak a ni a, an Chairman PC. Siamliana chuan an pawl indin dan leh an hmalakna hrang hrangte a sawi a. Kum 2015 atangin Bawngchawm tlang-ah Kel vulh bul an tan thu te, Kel 75 vel lai an neih hnuah hri leh Sa avanga harsatna an tawh thu te, hemi hnu hian Bawng te vulh tela hma an lak thu bakah sawrkar puihna hrang hrang hmanga hmalakna an kalpui mek thu te an tarlang a. Mipui ten an duh hun apianga Kel lei tur an neih theihna turin tunah hian hmalakna an kalpui tak thu leh hmun hrang hrang atangin Kel te hi lachhawngin lei tur an neih reng thu bakah tunah hian Kel 115 vel an neih mek thu te an sawi bawk a ni.

Serchhip Livestock Farmers’ Cooperative Society-ah hian tun dinhmunah member mi 17 an awm mek a, nimin-a Assembly-ah hian kum 2023-2028 chhunga an hruaitu tur thlanna neiin Chairman-ah PC. Siamliana (Chhim Veng); Vice Chairman-ah Lalthlanthanga (Tuikhuah Veng); Secretary-ah C. Lalhminghlua (Chhim Veng) leh Treasurer-ah C. Zokhuma (Tuikhuah Veng) te thlan an ni.