PIGFED Ltd. Annual General Meeting hmanpui

Mizoram Pig Producers’ Cooperative Federation (PIGFED) Ltd. chuan nimin khan Annual General Meeting vawi 28-na hmangin AH & Vety Minister Er. Lalrinawma chuan a hmanpui a ni.

Vety Polyclinic Hospital Conference Hall, Aizawl-a PIGFED Ltd. Annual General Meeting-ah hian AH&Vety Minister chuan Primary Society te chu ram leh hnam intodelh theihna tura hmalakna fawng pawimawh berte zinga mi an nih avangin Society member-te tanrual a pawimawh thu a sawi a. A bulthut dawmkan chu hmasawnna a nih thu sawiin, Sawrkara Project thehluh reng rengte pawh Primary Society-te dawmkang zawnga hmalakna a nih chuan ngaihpawimawh a nih zel tur thu a sawi a. ASF hri vanga harsatna tawkte a tuarpui thu sawiin, hun harsa a liam mek a, beiseina nen tluang taka kal leh thei turin kalkhawmte chu duhsakna a hlan a ni.

He hunah hian C. Lalmuanpuia MLA pawhin Mizo Society-ah Vawk vulhin hmun thuk tak a luah reng thu leh sawrkar pawhin a ngaipawimawh reng thu sawiin, kum 2018-a SEDP hmalaknaah pawh a hmasa berte zingah dah a nih thu a sawi a. Vawk hrileng vanga harsatna vangin sawrkar hmalakna beisei anga kal tha theilo chu pawi a tih thu a sawi bawk.

PIGFED Ltd. hnuaiah hian affiliated Primary Society 163 awm mekin member 4000 chuang an awm a. Annual General Meeting-ah hian Palai 158 telin AH&Vety Director Dr. Lalrinpuii Sailo pawhin thu a sawi bakah Dr. Rosangzuala, Managing Director, PIGFED Ltd. chuan kum 2022-2023 chhunga PIGFED Ltd. hmalakna te a tarlang bawk.