Serchhip District-a Bank hrang hrang ten March thla tawp thlenga hma an lak dan thlirho a ni

Serchhip District chhunga Bank hrang hrang ten March 2023 Quarter tawp thlenga hma an lak dan thlirin nimin khan District Consultative Committee/District Level Review Committee thutkhawm neih a ni.
He thutkhawm Serchhip DC Meeting Hall-a neih hi District Bawrhsap Nazuk Kumar IAS chuan kaihruaiin Serchhip District-a Lead District Manager Robert Zosangliana chuan kumin March thla tawp Quarter thlenga Bank hrang hrangte hmalakna leh an chet dan te a tarlang a. He huna tarlan a nih danin nikum December thla tawp Quarter thlenga Serchhip District-a Bank hrang hrang te Credit Deposit (CD) Ratio chu 70.13% a nih laiin kumin March thla tawp Quarter-a CD Ratio chu 60.11% ah a tlahniam a, hemi hun thlenga Bank hrang hranga sum dahluh chu cheng nuai 55581.66 niin Bank ten loan an pekchhuah chu cheng nuai 33410.94 a ni tawh thung. Serchhip District-a Bank hrang hrang 16 awm zingah PNB Serchhip chu CD Ratio sang ber niin 193% zet a ni a, CD Ratio in 60% tling lo Bank 5 awmin heng te hi Bawrhsap chuan an dinhmun a zawtfiah bawk a, CD Ratio hniam ber chu HDFC Serchhip niin an CD Ratio chu 1% chiah a ni.

Social Security Schemes hrang hranga hmalak dan tarlanna ah pawisa chawi awm lo (0 balance) a Account hawnna Pradhan Mantri Jan Dhan Yojana (PMJDY)-ah Mipa Account nei 8795 awmin hmeichhia 10,376, an vaiin 19,171 an awm mek a. Pradhan Mantri Jeevan Jyoti Bima Yojana (PMJJBY) hnuaiah Enrolment 16,965 awmin PMJJBY hi kumtin Insurance Premium Rs. 436/- chawia in-register theih a ni a. Kumtin May leh June thla-ah renew zel niin renew-na tur pawisa hi Account-ah a awm ngei ngei a ngai a, inngaihnathiamna a awm thei lo a ni. He Scheme-a in-register te chu eng natna vang pawha an thihin an thih hnuah an Nominee te'n Cheng Nuai 2 thleng an dawn theihna Scheme a ni.

Pradhan Mantri Suraksha Bima Yojana (PMSBY) hnuaiah Enrolment 38,0136 awm mekin kumtin Rs. 20/- chawia in-register theih a ni a, PMSBY hi Accidental Insurance niin Accident thil avanga an boralin Nominee te'n hamthatna cheng nuai 2 thleng an dawn theihna a ni. Atal Pension Yojana (APY) hnuaiah kum 18-40 tan in register theih niin tunah hian 979 in-register tawh an awm bawk.

Sawrkar laipui Scheme bawhzuina hnuaiah NRLM kaltlangin mi 149 hnenah cheng nuai 428.76 pek ni tawhin PMEGP hnuaiah mi 102 te cheng nuai 511.99 pek an ni tawh bawk a. Annual Credit Plan (ACP) hnuaia hmalakna ah Agriculture Sector-ah loan cheng nuai 3366.66; MSME hnuaiah cheng nuai 3171.34 leh Other Priority Sector-ah cheng nuai 2862.89 pek an nih tawh bakah KCC hnuaia hmalakna leh hmalakna dang te tarlan a ni bawk.