SW&TA MInister in MSCPR Office a tlawh

Social Welfare & Tribal Affairs Minister Er. Lalrinawma chuan nimin khan Mizoram State Commission For Protection of Child Right Office tlawhin he Office-a thawktute nen an inkawm bawk.

MSCPR Conference Hall-a an inkawmna ah hian Minister Er. Lalrinawma chuan naupangte dikna chanvo leh humhimna kawng a hna thawk thin Mizoram State Commission For Protection of Child Right thawktute chu fakawm a tih thu leh dan hnuaiah dik taka hmalak a nih zel chuan naupang chunga hleilenna awm thin chu a tlem phah zel a beisei thu a sawi a, Naupangte dikna leh chanvo humhim chu mitinte mawhphurna a ni tih sawiin, Nu leh pa thenkhat mahni fate pawh enkawl thei lo an awm thin chu pawi a tih thu leh naupang kumtlinglo leh rilru thianghlim tak chunga mawilo taka thil ti thinte a dem thu a sawi a, “Kan Pathian thuin naupangte chunga ngilnei tura min zirtir angin Nu leh Pa ten kan fate himna theuh kan ngaih pawimawh chu thil tul tak a ni,” a ti bawk.

Inkawmhona hun hi MSCPR Chairperson Dr. C. Lalsangzuala chuan kaihruaiin Dr. Julie Remsangpui Fambawl, Member MSCPR in an hmalakna leh an hmachhawp te a sawifiah a, MSCPR hi Naupangte himna turin kum 2018 khan din niin naupangten himna kawngah an dikna chanvo an hmuh theihna tura an beih dan hrang hrang leh an hmachhawp te tarlangin, Hostel, Jail leh hmun dang dangte an tlawh thin thu a tarlan bakah Naupang ten harsatna an tawh chungchangah MSCPR an biakpawhna tur hian Helpline No. 6009888804 siam a ni tih a sawi bawk.