Serchhip District-a ruihhlo dona a hmalak dan thlirho

Nimin khan Serchhip District Level Narco Co-ordination Committee (NCORD) Meeting vawi 7-na chu an Chairman leh District Bawrhsap Nazuk Kumar IAS hovin neih a ni.
Serchhip DC Meeting Hall-a he thutkhawm ah hian thutkhawm hnuhnung ber March 31, 2023-a neih leh tun tum thutkhawm inkara ruihhlo dona kawnga an hmalakna hrang hrangte chu Serchhip SP leh Member Secretary Vanlalnghenga chuan a tarlang a. Excise & Narcotics Department atangin Asst. Commissioner Malsawmkima chuan hemi hun chhunga an hmalakna hrang hrang a tarlang bawk a. Serchhip Sub-Hqrs. YMA hruaitute pawhin an hmalakna leh ruahmanna an neih te tarlangin, Bawrhsap chuan ruihhlo dona kawngah thalai, kum lama naupang zawkte an tel tam theih dan tur ngaihtuah tha a tih thu a sawi bawk.

He hunah hian tun thla ni 26-a International Day Against Drugs abuse and Illicit Trafficking hman tur chungchang pawh sawilan a ni a, hemi pual hian zirlaite tan Essay inziahsiakna neih a nih tawh thu leh June 18 khan Presbyterian Chhim Veng Kohhran Tleirawl Inkhawm ah ruihhlo that loh zia inzirtirna neih a nih tawh thu tarlan a ni a. He ni pual hian June 26 zingkar ah Rally neih tum a ni a. Rihhlo laka fihlim tur leh a dona kawnga thawktute tanpui tura intiamna ‘Signature Campaign’ pawh neih tum niin Drugs do a ngaih zia ti langchiang tur thuziak tarlangin Serchhip Bazar hmun remchang ah a duh apiangte hman theih turin Photo/Selfie Booth siam a ni ang.