Kudam 52-ah buhfai chhekkhawl a ni tawh

Supply Minister K. Lalrinliana chuan Furpui lo thleng turah Mizoram in buhfai-a harsatna a tawh loh nan Kudam 52-ah buhfai chhek-khawl ngah a ni tawh tih a sawi.

Thuthar thehdarhtute zawhna chhangin Supply Minister K. Lalrinliana chuan Mizoram pumah Supply Department enkawl buhfai chhekkhawlna Kudam 120 a awm thu leh heng zinga Kudam 74 chu Fur laia buhfai chhekkhawl ngaihna hmun a ni tih a sawi a. Kudam 74 zinga Kudam 52-ah buhfai hi chhekkhawl ngah a ni tawh tih sawiin, a bak Kudam 22 te chu National Food Security Act (NFSA) leh Open Market Procurement (OMP) atanga buhfai dawn hmabak dawn zawh a nih hunah Fur lo thleng tur atan buhfai hi chhekkhawl ngah tawh tura ngaih a nih thu a sawi bawk. 

Supply Minister K. Lalrinliana chuan, buhfai hi inkalpawhna kawngpui thatna hmun Aizawl, Lunglei, Serchhip leh Kolasib-ah te chuan chhekkhawl ngai ker lo a ngaih a nih thu pawh a sawi a, kudam thenkhat ah chuan kumin December thla thleng daih chhekkhawl a nih bakah thla 3 daih chhekkhawlna pawh a awm thu a sawi bawk.