International Day against drug abuse and illicit Trafficking-ah ruihhlo that loh zia inzirtirna nei

Khawvel puma ruihhlo hmansual leh tawlhruk dona ni, International Day Against Drug Abuse and Illicit Trafficking chu nimin June 26, 2023 khan khawvel hmun hrang hrangah hman niin Serchhip-ah pawh ‘Ruihhlo hi ram leh hnam hmelma a ni’ tih thupui hmangin hun hman a ni.

International Day Against Drug Abuse and Illicit Trafficking, World Drug Day tia hriat bawk denchhen hian Serchhip-ah chuan zingkar-ah Serchhip District Police bultumin Serchhip Police, Excise & Narcotics Department, School Education Department leh BSF te chuan Serchhip IOC Veng atanga Bazar thlengin Ruihhlo thatloh zia inzirtirna neiin Rally neih a ni a. He Rally-a tel te vailiamtu Serchhip Addl. SP Saidingliana Sailo chuan International Day Against Drug Abuse and Illicit Trafficking chu June 26-a hman turin kum 1987 khan United Nations chuan a lo rel tawh thu leh kumtin khawvel pumah ruihhlo hmansualna leh ruihhlo avanga thi mi tam tak an awm thu sawiin, Mizoram-ah ngei pawh ruihhlo in kan khawtlang leh chhungkaw nun a tihbuai thu a sawi a, hei vang hian he ni hi urhsun taka hman thin a nih thu leh hmun hrang hrangah ruihhlo thatloh zia leh a nghawng rapthlak zia inzirtirna te neiin Ruihhlo laka inthiarfihlim tura intiamna hunte an buatsaih thin thu a sawi bawk.

Serchhip Addl. SP chuan Ruihhlo ngawlveite hi damlo angin mithiam te chuan an sawi thu leh thiam taka enkawl a, nun kawng dik an zawh leh theihna tura kaihhruai chu mitin mawhphurhna a nih thu sawiin, “Anmahni endawng leh hmuhsit te, vantlang zinga enhran te, anmahni diriam te hi kan ti tur a ni lo,” a ti a. Ruihhlo avanga harsatna nei leh ngawlvei te chhanchhuak tura kan tanrual a pawimawh thu pawh sawiin, hetiang thil tha lo leh midangte chhiatna tura sumdawng thin te pawhin an thil tih thatloh zia leh ram leh sawrkar Dan phalloh a nih bakah midangte nun tihchhiatna a ni tih hre tharin sim hmak se an duh thu a sawi a. Hetiang kawnga Dan bawhchhia te chungah Dan hmanga na taka hremna lekkawh zel a nih dawn thu sawiin, he ni-ah hian kan theihna zawn theuh ah damdawi hmansual leh sumdawnna bawlhhlawh, dan lova ruihhlo tawlhruk do pui ah mipuite chu a sawm a, “Kan zavaia tanrualna leh inpumkhatna hian rah tha a chhuah ngei ka beisei bawk a ni,” tiin Rally-a tel te hi a vailiam a ni.

Kumin-a International Day Against Drug Abuse and Illicit Trafficking-ah hian thupui atan ‘People first: stop stigma and discrimination, strengthen prevention’ tih chu hman niin he ni pual hian zirna In hrang hrangah ruihhlo thatloh zia inzirtirna te neiin zirlaite tan Essay inziah-siakna te pawh neih a lo ni tawh a. Nimin zing-a Rally-ah hian mi 70 vel telin, Serchhip Bazar-ah Rally kharna neiin Serchhip DSP (Hqrs.) Kaste Romalsawma chuan lawmthu sawiin hun a hmang bawk a ni.