Mizoram Employees’ State Insurance Society thutkhawm Chief Secretary hovin neih a ni

Mizoram Employees’ State Insurance Society (MESIS) thutkhawm chu nimin khan Chief Secretary Dr. Renu Sharma IAS hovin Chief Secretary Conference Hall-ah neih a ni.

Employees’ State Insurance (ESI) Scheme hi Private hnuaia thawkte hamthatna atan India Sawrkarin kum 1948 khan a din a, he Scheme hnuaia inziaklutte leh an chhungten damlohna, naupai leh nau neih chungchangah te, hnathawhna avanga ramtuileilohna leh thihna hial tawh thlenga hamthatna an dawn theihna atana duan a ni. He Scheme hnuaiah hian sumdawnna hmun eng pawh – Hotel, Thingpui dawr, Cinema Hall, Chanchinbu chhutna hmun, Dawr, Zirna In, Damdawi In leh a dangte-a mi 10 aia tlem lo hnathawktu awmna te an in register vek tur a ni a. Heng hmuna thawk, thla khata Rs. 21,000/- aia tam lo hlawhte chuan ESI Act hnuaiah hian hamthatna hrang hrang an dawng thei a ni.

ESI Scheme hnuaia inziaklutte hian hnathawktu (Employee) in a hlawh atanga 0.75% leh a chhawrtu (Employer) in hnathawktu hlawh atanga 3.25% thla tin a chhunluh a ngai a. Hnathawktu ni khata Rs. 137/- hlawh tling lote chuan hnathawktu hlawh atanga pek tur 0.75% hi chhunluh ve a ngai lo a. Tun dinhmunah Mizoram-ah ESI Scheme hnuaiah hnathawk mi 4006 leh establishment/unit 324 an in ziaklut tawh a ni.