Ran enkawlna kawnga hmalak dan tur sawiho a ni

Mizoram State Animal Welfare Board (MSAWB) thutkhawm chu niminpiah khan neih niin 'Prevention of Cruelty to Animal Act 1960' hnuaiah inkaihhruaina dan siam an rel.

SAD Conference Hall-a Mizoram State Animal Welfare Board (MSAWB) thutkhawm hi AH&Vety Minister Er. Lalrinawma chuan kaihruaiin Mizoram-a ranvulhte bakah State pawn atanga ran lakluh te pawh duat taka enkawl an nih na tur atan Mizoram State Animal Welfare Board chuan nasa takin hma a lak thin thu tarlangin, uar zawka hmalak zel anih tur thu a sawi a ni. He thutkhawm ah hian J.B. Foundation-a ran chhanchhuahte enkawl emaw, lachhawng (adoption) duh an awmin inkaihruaina felfai tak a awm theihna turin AH & Vety Department in 'Prevention of Cruelty to Animal Act 1960' hnuaiah inkaihhruaina (guidelines) felfai tak lo siam se tiin Ran phurh chungchangah 'The Transport of Animal Rules 1978' chu khauh zawka kalpui ni se, dan bawhchhelo tura inzirtirna uar zawk a kalpuiin Mizorama Kohhran leh pawl hrang hrangte hnenah lehkha sem nise an tih bakah dan bawhchhiate hrem an nih ngei theihna tura hmala turin J.B.Foundation- te chu ruat an ni.

Ui inthlahpuntir leh zawrh chungchangah 'The Prevention of Cruelty to Animals (Dog Breeding and Marketing) Rule 2017' chu khauh zawka kalpui a, Ui inthlahpuntir duh bikte tan State Animal Welfare Board-ah registration ti ngei turin hmalak nise an ti a. Ran leh ran, ran leh mihring inkara buaina lo thleng thin ah a tul anga hmalak a nih theih nan AH&Vety Department chu inkaihhruaina lo siam tur a tih an ni bawk.

Heng bakah hian AH&Vety Call Center Helpline No 1962 chu ran leh ramsa tihduhdah tuar an awm a mipuiten thuneitute hnena an report zung zung theih nan zawm ve nise an ti a. Cruelty to Animals Act hnuaiah Police leh Transport Department-te chu zirchianna neihpui tha tiin zirlai naupangte hnenah pawh inzirtina kalpui nise an ti bawk. Mizoram puma Local/Village Council-te hmantlan theih tur ran khuahkhirna dan tha zawk siam turin 'The Mizoram Animal (Control & Taxation) Act 2014' chu ngun leh zuala zirchian nise, ran thi te phumna tur (common cementry) siam nise, LC leh VC hnenah a tul ang a ram dil nise tih a ni. Ui talh leh a sa zawrhna te a lo tlem zawk theih nan 'The Mizoram Animal Slaughter (Amendment Act 2020)' chu khauh taka kalpui nise an ti a, Uisa zuar tihrem nan Ui talh leh a sa zuar thinte lakah a tul anga complaint thehlut turin MSAWB chuan hma la se tih an rel bawk.

Mizoram State Animal Welfare Board hi 'Prevention of Cruelty to Animal Act 1960' hnuaiah din niin theih ang ang a hmalak zel a nih theih nan Animal Welfare Board chuan Animal Welfare Wing chu Directorate, AH&Vety Department-ah dinin, AH& Vety Department hian a theih ang angin hma a la chho mek zel a ni.

Comments

Popular News (Last 30 Days)

Vawiin-ah HSLC result

Vawiin-ah HSSLC Exam result