Lengteng Bial-a Rangva In chung sem tur vailiam

Lengteng bialtu MLA leh Human Resources Development Board Vice Chairman Dr. L. Thangmawia MLA chuan ‘Hlunsanga Malsawmna Scheme’ hnuaia Lengteng bial chhunga Rangva Inchung la nei lo chhungkaw 45 te tana Rangva sem tur chu nimin khan a vailiam.

Heng Rangva Inchung tur vailiamna hun Community Development Action and Reflection (CDAR) Complex, Tuirial Airfield, Aizawl-a neih ah hian Dr. L. Thangmawia chuan Lengteng bial atanga Zoram zalenna puanna a hming ziak (Signatories) awmchhun, Kawlkulh khua Hlunsanga (L) hming chawia siam ‘Hlunsanga Malsawmna Scheme’ hi kumin January ni 31 khan Kawlkulh-a Hlunsanga (L) In-ah hawn a lo ni tawh tih sawiin, kum thum (2023 – 2025) chhung kalpui tur a nih thu a sawi a. He Scheme hnuaiah hian Lengteng bial chhunga Rangva Inchung la nei lo leh rangva Inchung tuiek chhe tawhte thlak sak tura ruahmanna siam a nih thu a sawi.

Lengteng Bialtu MLA chuan Ngopa leh Khawzawl BDO te leh Lengteng bial khaw hrang hrang VC te kaltlangin Lengteng bial chhunga rangva In la nei lo chhungkaw 28 report dawn a nih thu sawiin, “Rangva ngaihtuah mek a nih laiin chhungkaw 17 rawn luh belh lehin tuna a thawh khatnaah hian chhungkaw 45 te tan rangva bundle 4 zel pek an ni dawn a, a dawngtu tur hi party induhsakna tel lovin, rangva Inchung la nei lo apiang te a zawna zawn chhuah an ni,” a ti bawk.