Serchhip Field Veng VC-a bye-election tur atan Draft Electoral Roll tharchhuah a ni
Serchhip Field Veng Village Council-a VC Member pakhat chu nikum khan boralin he VC-a General Seat pakhat chu a ruak a, hei vang hian State Election Commission (SEC) Mizoram chuan he VC Seat ruak hnawhkhahna atan hian bye-election buatsaih turin hma a la mek a. Hemi atan hian Electoral Roll enfiah hna chu thawh tan niin nimin khan Serchhip Addl. DC leh Asst. District Election Officer (DEO) James Lalnithanga chuan Draft Electoral Roll chu a tlangzarh a, kumin June 20-a State Election Commission atanga thu an hmuh angin Draft Electoral Roll hi tarchhuah a nih thu Addl. DC chuan sawiin, VC inthlanna leh MLA/MP inthlanna a Electoral Roll te chu thil hrang daih a nih thu leh hei hi mipuite pawhin an hriat a tul thu bakah VC inthlanna neihna tur huamchhunga mipuite pawhin an ngaihven a pawimawh thu a sawi a. Draft Electoral Roll tarchhuah tak chu Electoral Registration Officer (ERO) 26-Serchhip (ST) AC, Assistant Electoral Registration Officer (AERO) 26-Serchhip (ST) AC leh Village Level Officer (VLO) te leh DC Office (Election Branch)-ah te en theih a nih thu a sawi bawk.
He hunah hian Serchhip Election Officer Lalrinsanga Hnamte chuan Serchhip Field Veng Village Council Draft Electoral Roll dinhmun tlangpui sawiin, Draft Roll-ah hian vote nei mi 830 awmin an zinga 381 chu mipa an ni a, midang 449 te chu hmeichhia niin mipa aiin hmeichhia vote nei 68 in an tam zawk a. Vawiin (June 27, 2023) atang hian he VC Area mipuite tan hian hming thun, paih leh siamthat ngai te tan dilna hun hawn nghal niin July 11, 2023 thleng dilna thehluh theih a ni a, heng dilna te hi July 11-17, 2023 chhunga enfiahin July 18, 2023-ah Final Electoral Roll tarchhuah a ni anga. Tunah hian inthlanna neih hun tur hi puan la ni lo mah se Mizoram in Assembly inthlanpui a hmachhawn leh dawn avangin hun reilote ah inthlanna hi neih an rin thu a sawi bawk.
.jpeg)
Serchhip Field Veng Village Council Electoral Roll thar turah hian kumin July ni 1-a kum 18 tling chin te thun thar theih an ni dawn a, Election Commission in MLA leh MP inthlanpui atana Electoral Roll chu Draft Roll atan hmangin Non-Tribal, Mizoram chhung mi ni lo te chu paih tur an ni a, hming thun belh tur leh Electoral Roll a hming chuang tur chu a VC Area a awm nghet an ni tur a ni bawk. Serchhip Field Veng VC Draft Electoral Roll tarchhuah tak hi Asst. DEO chuan Political Party leh Serchhip Field Veng Branch YMA te hnenah a copy pein mipuite tan en theih a ni dawn bawk a ni.
Comments
Post a Comment