Rualbanlote tana sawrkar hna hauhsak chu Mizoram sawrkarin a kalpui tha niin hria

Persons with Disability (PwD) Commissioner Vanlaldiki Sailo chuan rualbanlote tana sawrkar hna za zela pali (4%) hauhsak chu Mizoram sawrkarin a kalpui tha nia a hriat thu a sawi a. Hmun hrang hranga rualbanlo te kal ve theihna tur siam kawngah erawh duhthusam lo a la tam thu a sawi thung.

PwD Commissioner Vanlaldiki Sailo chuan Mizoram pumah pianphunga rualbanlo ‘Persons with Disability’ mi 15,160 an awm anga chhinchhiah a nih thu sawiin, rualbanlo chhinchhiah 15,160 zinga 8,198 hi mipa niin 6,962 chu hmeichhia an ni a, heng mite bakah hian chhinchhiah loh mi engemaw zat an la awm rin a nih thu a sawi a, Rualbanlote tana sawrkar hna za zela pali (4%) hauhsak chu Mizoram sawrkarin a kalpui tha nia a hriat thu sawiin PwD Commissioner chua, “Sawrkar department hrang hrangte hian an kalpui tha hlein kan hria a, engemaw tih nachang hre lo te chu lehkha in kan umzui zel a. PwD quota hmang hian rualbanlo mi 100 ve zetin hna an hmu tawh a ni,” tiin Skilled leh Skilled lo te niin an zingah hian lehkhathiam tak tak, sawrkar hna sang thleng chelh an awm bawk a ni.

PwD Commissioner chuan tunhmaa rualbanlohna chi sarih (7) awm thin kha tunah chuan chi 21 a awm tawh thu pawh sawiin, rualbanlote Certificate pechhuak thei Doctor hi an awm tlem avangin June 19 leh 20 khan phai lam mithiamte chah chhuakin Mizoram Doctor-te training an pe tih a sawi a. A hmaa rualbanlo Certificate pe tura Aizawl kal kher ngai thin kha training neih hnu hi chuan a ngai tawh dawn lo niin a sawi bawk.

Sawrkar Office, Biak In leh vantlang punkhawmna hmuna rualbanlote kal ve theihna tur siam kawngah erawh duhthusam lo a tam nia sawiin PwD Commissioner chuan, “Vantlang punkhawmna hmunte hi rualbanlote tana thlen theih vek tura siam tur a ni a. PwD-te wheelchair an kal vena tur (ramp) te, an inthiarna tur bik (special toilet), lift-ah pawh mitdel ten an hriat ve theih tura ri awm ngeite hman tur a ni,” a ti a; mahse, hengte hian ngaih pawimawh a hlawh tawk lo deuh nia a hriat thu a sawi a. Building sak tawhte pawh siam that leh a ngai nia sawiin, “Rights of Persons with Disabilities (RPwD) Act, 2016-ah chuan rualbanlote kal ve theihna turin tunhma building hlui deuhte pawh siamthat leh nan February, 2022 thleng hun a pe a; mahse, heti chung hian la siam that loh a tam hle a ni,” a ti a. Hengte hi siam tha turin ziakin lehkha an pe tih a sawi bawk.