Serchhip Darnam Tlang-a vbc. 3 senga sak MYC Youth Centre chu hawn a ni ta
MYC Youth Centre hawnna hunah hian MYC Chairman Dr. Vanlaltanpuia chuan Mizo thalai ten zirna lam chauh ni lo, kawng hrang hrang ah eizawnna an neih theihna tura MYC in hma a lak thu sawiin, chumi atan chuan Serchhip-a MYC Youth Centre chu tangkai taka hmang turin ruahmanna an siam thu leh thalaiten thiamna leh hriatna an hmuhna hmun pawimawh an chantir dawn thu a sawi a. Mizo thalaite chu an changkangin, hma pawh an sawn thu leh eng kawngah pawh zirtirna leh kaihhruaina tha kaan dawn chuan hlawhtlinna kan chang mai thin tih sawiin, amaherawh chu tunhnaiah UPSC Exam-a Mizo thalai ten hlawhtlinna an chang khat ta deuh tih a sawi a. Hei vang hian MYC chuan hemi lamah hian nasa taka hma lain sawrkarin sum a pek hmangin hripui karah zirlai beisei awm engemawzat Delhi-ah an tirh thu leh thla nga emaw chauh an kal hman thu a sawi a. Nikum khan zirlai 40 te tir lehin kumin ah chuan UPSC Prelims paltlang pawh an awm ve tak nual thu a sawi a, “Tunah hian kan thalai tam tak IAS nih tum ruh tlat kan ngah tawh hle a, kawng dik kan zawh chhoh zel bawk avangin engtikah emaw chuan kan la tling chur chur dawn niin ka hmu a ni. Kuminah ngei pawh hian Super IAS 2023 buatsaih leh tumin MYC chuan hma kan la mek a, a zat bituk lawk lovin theihna nei nia kan hriatte chu an vaiin Delhi a Coaching kaltir kan tum dawn a ni,” a ti bawk.
MYC Chairman chuan MYC hmalakna leh hlawhtlinna te tarlangin, MYC kaihhruaina hnuaiah thalai 70 te Sipai-ah tlingin, thalai 142 ten sawrkarah hna an hmuh tawh thu leh mi 38 ten Bank lamah hna thawk hmuin mi 40 chuangin Company-ah hna an hmuh tawh thu a sawi a. MYC in hna zawngtu thalaiten hnaruak awmna an hriat zung zung theihna tura Mizo thalai Software thiamte hmanga a siam "Hna Inpui" chu NEC lamin tha an tih em avangin North East State zawng zawng huapa hman tur siam tura ngenin tunah hian buaipui mek a nih thu a sawi bawk.
MYC Youth Centre hawnna hun hi MYC Secretary H. Lalnunzuala chuan kaihruaiin Serchhip Addl. DC James Lalnithanga chuan inlawmna thu a sawi a, helai hmun hi Serchhip thalaite tan hmun tangkai tak a nih ngei an beisei thu leh hawn a nih theihna tura thawktute chungah lawmthu a sawi a. A lo changtluna a lo puitlin zel theih nan theihtawp an chhuah dawn thu a sawi bawk a. MYC-a Superintendent Doris Zothanchhungi chuan he building sak chungchangah Technical Report a pe bawk a ni.
Nimin-a hawn tak Serchhip Darnam Tlang-a MYC Youth Centre sa tur hian Nov. 30, 2020 khan lungphum phumin Brilliant Consultancy chuan a sak hna hi cheng nuai 300 in an thawk a, thla 36 (kum thum) chhunga zawhfel tura tih niin huntiam a ral hma hian luah theih tura hawn a ni a. A Building hi RCC a sak niin Zopa chhiara chhawng thum a ni a, a chhawng hnuai berah hian lirthei dahna tur bakah Chowkidar Quarters awmin a chhawng hnihna ah Office, Carrier Guidance & Entrepreneurship Knowledge Centre/Studio, Meeting Room/Audition & Drama Room bakah mipa leh hmeichhe tan khum 10 ve ve awmna Guest Room leh Toilet a awm a. A chhawng chung berah hian Main Hall awmin hei hi Indoor Volleyball khelh theihna tura ruahman a ni bawk a. He building-ah hian ruahtui dawn theihna tur RCC hmanga siam Tuizem litre 20,000 dawng a awm bawk a ni.
MYC Youth Centre hawnna ah hian Serchhip-a sawrkar Department hotute leh khawtlang hruaitu thahnem tak an tel a ni.
Comments
Post a Comment