Party chhungah harsatna lian a awm lo - ZPM Leader

ZPM Leader Lalduhoma chuan an Party chhungah harsatna lian a awm lo tih sawiin, “Kan hritlang ve lik lek chauh a, damdawi In-ah admit ngai erawh an awm lo,” a ti.

ZPM Party in nimin-a Aizawl-a an Party Office-a Chhung Inkhawm an neih ah ZPM Leader Lalduhoma chuan ZPM Chhungkua chu buai hle a chhuah tum an awm thu sawiin, “He Party din tirh ata theihtawp chhuahin min bei char char reng a ni. Leader chung-chang ah te, thawhhona chungchangah te, Chief Minister chungchangah te buai leh kal hlei thei lo turah te min ngai a, Pu Sapdanga nen kan inkar chungchang te pawh kan sawi zing lutuk tawh. Heng an sawi zawng zawng hi dik se ZPM hian Vawiin hi kan thleng lovang, kan pung hek lovang,” a ti a. Kum 2018-a an harsatna chu bial vil tur leh ding tur a an harsatna a nih thu pawh sawiin, “Kum 2018 letling chiahin kan awm ta a, kan luhai dan pawh a dang ta. Mi tha tak tak, party tana rinawm leh taima bial vil tur chang lo tam tak an awm thei ta hi a ropui hle a ni. Party chhungah harsatna lian a awm lova, kan hritlang ve lik lek chauh a, damdawi In-ah admit ngai erawh an awm lo,” tiin “He thil avanga party atanga chhuak ta hi mi tlem azawng Lunglei lamah an awm ve a, chu bak an awm lo,” a ti bawk.

Lalduhoma chuan an party chu dik lo taka puh an nih thin thu pawh sawiin, “ZPM an inti tha bik, an intithianghlim bik, Kohhran hi kan Unit an ti tih te vawrhdarh a ni a; Party dang sawrkar tawhte engmah thatna nei lo leh chhe lailet dera puh angin min sawi bawk thin a, hetiang hi kan party hian kan sawi ka la hre ngai lo. Party dang engmah thawh-chhuah nei lo, chhe lailet der anga kan sawina chu rawn dahchhuak ngam se kan ti a ni,” a ti a. “ZPM chuan party dangten sawrkarna an lo siam tawh aia thaa sawrkarna siam kan tum tlat a, kan danglam dawn tih kan sawi a, a bikin Corruption chungchangah fihlim kan tum a, Corruption rim nam Minister leh MLA kan awm a thiang ve dawn lo a ni,” a ti bawk.