Mission Vatsalya-a Sponsorship dawng tur mi 54 thlang

Nimin khan Serchhip-ah Mission Vatsalya, tunhmaa Integrated Child Protection Scheme (ICPS) tia hriat thin hnuaia District Sponsorship & Foster Care Approval Committee thukhawm chuan kum 2022-2023 chhunga Sponsorship dawngtu tur naupang 54 an thlangchhuak.
Mission Vatsalya hnuaia District Sponsorship & Foster Care Approval Committee hi nimin khan an Chairman, Serchhip District Magistrate leh Addl. DC James Lalnithanga hovin Serchhip DC Meeting Hall-ah an thukhawm a, he hunah hian kum 2022-2023 Financial Year chhunga Mission Vatsalya atanga District Child Protection Unit (DCPU), Serchhip in Sponsorship Fund a hmuh atanga tanpuina dawng tur hi an thlangchhuak a, he tanpuina dawng tur thlangchhuak tur hian kaihhruaina mumal tak awmsa in hemi hmang hian tanpuina dawng tura rawtna lut atangin mi 54 hi thlanchhuah an ni.

District Sponsorship & Foster Care Approval Committee-ah hian District Magistrate chu Chairman niin Member-ah Mission Vatsalya atangin District Child Protection Officer (DCPO) leh PO (NIC) bakah Serchhip District-a Child Welfare Committee (CWC)-a Chairperson leh MHIP Sub-Hqrs. Serchhip-a President te an tel bawk a ni.