Sairang-ah FCS&CA Kudam sakna tur lungphum nimin khan Chief Minister in a phum

Chief Minister Zoramthanga chuan nimin zing khan Sairang-ah FCS&CA Kudam thar sakna tur lungphum phumin, he Godown hi Zuangtui-a FCS&CA Kudam sawnna tur a ni a, Chief Minister chuan Sairang-a Rel lu lo lut tur nen awlsamna nasa zawk a thlen ngei a rin thu a sawi.

Sairang Dinthar Horticulture Department hmunah Kudam sakna tur lungphum phumna puala inkhawm neih ah Chief Minister chuan Sairang Dinthar-ah Kudam lian sak a ni tur chu lawmawm a tih thu sawiin, Kudam hi sak that a nih hnuah Zuangtui-a Kudam hlui chu tangkai taka hman tum a nih thu a sawi a. Tun hma a sawrkar tan hmun remchang a la nih theih ringa sawrkar in Sairang a ram a lo neih chu a tangkaina hmuh tak zel a nih thu leh chulai ram-a FCI Kudam lian tha tak sak mek chu tuna lungphum an phum FCS&CA Kudam nen inhnaih taka awmin buhfai phurchhuah Mizoram hmun hrang hranga sem darh kawnga nasa taka awlsamna a thlen tur thu a sawi bawk.

He hunah hian FCS&CA Minister K. Lalrinliana chuan Zuangtui Kudam chu mipui tam zel leh khawpui thang zel avangin sawn a tul tak thu leh Sairang Dinthar-a hmun tha hmuh a ni chu alwmawm a tih thu a sawi a. A chhak chiah-ah FCI Kudam sak mek a ni chu lawmawm a tih thu sawi bawkin, hei hian Tanhril FCI Kudam atanga FCS&CA Department Kudam-a man to tak taka buhfai phurhna sum senral thin kha a hum tur thu a sawi bawk.

Nimin-a lungphum phum tak FCS&CA Kudam hi SASCI leh NABARD atanga sum hmuh a sak tur a ni a. SASCI 2022-23 atangin Rs. 9,21,07,000 sanction niin building zau zawng hi 1220.86 sqm a ni a, buhfai MT 1500 a leng dawn a ni. Building hian verandah (1002.75 sqm) leh Loading & Unloading Shed (218.11 sqm) a huam tel dawn a, Approach Road siam te, luikam lung rem te, leivung hnawhkhah hmanga Parking Area siam leh thildangte a tel bawk.

NABARD atanga sum sanction chu Rs. 4,85,94,000 niin Kudam MT 1000 dawl zo tur, 1671.76 sqm pahnih sak a ni anga, Staff Quarters pawh a tel bawk ang.