Kan unau sahimna zawnga rawn tlanchhiate kan thlahthlam ngai dawn lo - Dr. R. Lalthangliana

Health Minister Dr. R. Lalthangliana chuan Manipur atanga raltlante enkawlna hmun hrang hrang Aizawl chhuahlam a mi te nimin khan tlawhin, “Kan unaute sahimna zawnga rawn tlanchhiate hi kan thlahthlam ngai dawn lova, kan tih theih chin chinah kan tang reng ang,” a ti.

Minister Dr. R. Lalthangliana hian nimin khan Aizawl chhuah lama Manipur atanga raltlante enkawlna hmun- Thuampui YMA Hall, Tuirial Airfield-a Osborne Moral Reformation Centre, Berawtlang hmun hnih-a raltlante enkawlna leh Central YMA Office Transit Camp te tlawhin heng hmun hrang hranga raltlan awm te hian an dinhmun leh harsatna an neih te Minister hnenah hian an lo thlen a. Dr. R. Lalthangliana chuan kan unau sahimna zawnga rawn tlanchhiate hi Mizoram sawrkar leh Mizoram mipuiten kan thlahthlam ngai dawn tih sawiin, “Kan tih theih chin chinah kan tang reng ang. An hriselna uluk taka vil reng turin hma kan la char char a, zirna kawnga an bahlah loh nan ruahmanna kan siam mek bawk a ni,” a ti a. Harsatna leh mamawh an neih a hnena an thlen te chu a theih ang anga a bawhzui tur thu sawiin, heng Camp hrang hrangah hian mamawh zuala an hman turin Rs 5000/- theuh a hlan nghal bawk a, Central YMA hruaitute nen inkawmin Rs. 10,000/- a hlan bawk a ni.

Health Minister hian Zoram Medical College (ZMC) in kum khat atana NMC Recognition an hmuh thar thu leh hmasawnna lawm-awm tak a nih thu a sawi a. COVID-19 hripui leng leh thildang harsatna tam tak karah hetiang dinhmun kan thleng thei hi a ropui hle tih a sawi bawk. 

Thuampui YMA Hall-ah hian Manipur atanga rawn lut raltlan chhungkua 20 awmin an vaiin mi 66 an ni a, an zingah hian naupang 20 an tel bawk a. Osborne Moral Reformation Centre-ah hian chhungkaw 29 atangin raltlan mi 115 an awm mek a, an zinga 70 chu naupang an ni a, naupang 7 chu School-ah luhtir an ni tawh a ni. Berawtlang Art & Culture Multipurpose Complex-ah raltlan mi 71 awm mekin Beraw Convention Centre-ah DMM Children's Home, Churachanpur a hnuchham naupang 28 leh anmahni enkawltu mi 5 an awm bawk a ni.