Aizawl-ah International Yoga Day hman a ni

International Yoga Day vawi 9-na chu nimin khan khawvel hmun hrang hrangah hman niin Aizawl-ah pawh Governor Dr Hari Babu Kambhampati hovin hman a ni.

Rajiv Gandhi Stadium, Mualpui-a International Yoga Day puala hun hman ah hian Governor chuan Yoga chu khawvel pumah hriat a hlawhin taksa tih hriselna atan te mi tam takin an hmang mek tih a sawi a, India in midangte mamawh leh midang tana thil tangkai a pekchhuah pawimawh tak tak zinga pakhat a ni tih sawiin, “Mizoram-ah kan nitin khawsak phung avangin Zunthlum, Cancer te vei kan tam em em a. Heng bakah hian kan thalaite zingah rilru lama harsatna – Anxiety, Depression leh a dangte vei an pung zel a. Heng kan harsatna te atanga kan fihlimna turin leh a tihdamna atan Yoga hmanga taksa sawizawi hi kan tih theih chuan a hlawkna kan tel ngei ang,” a ti a ni.

He hunah hian Health Department Principal Secretary Esther Lal Ruatkimi chuan he hun hman a nih chhan leh Mizoram-a Yoga Day kan lo hman thin dan te a sawi a. Hemi hnu hian Yoga Exercise lak danah Demonstration neih niin a ruala Yoga hmanga insawizawina hun hman a ni a. Governor te nupa leh sawmbik mi pawimawh te pawhin Yoga Day puala taksa insawizawi runpui hi an zawm ve bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar