MNF in hnehna sang tak chan leh ngei beisei

Mizo National Front (MNF) Media & Publicity Department chuan kumin inthlanpui-ah MNF chuan hnehna sang tak a chan leh ngei an beisei tih an sawi.

Inrinni khan Aizawl Press Club-ah chanchinbumite kawmin MNF Media & Publicity-a General Secretary, VL. Krosshnehzova chuan, “Mi thenkhatin hnathawk mang lo, engmah ti lo ang hialah he sawrkar hi an chhuah fo a. Chief Minister Zoramthanga kaihhruaina hnuaiah hian hripui rapthlak tak leng leh harsatna hrang hrangin min tlakbuak karah hmasawnna hna a thawk mek zel a ni,” tiin, MNF chu mahni thiltih that puanchhuah leh infak lam uar lo tak, mipuite tana ngawi renga hna thawk mawlh mawlh mai thin niin a sawi a. Chief Minister Zoramthanga chu India sawrkar mai ni lo, khawvel pawhin hruaitu tha leh rintlakah an ngai a, remna palai atan pawh vawi tam tak hman a lo ni tawh tih an sawi.

Chief Minister hmalakna thenkhat sawiin, Union Budget-ah Aizawl by-pass road vbc. 500 leh Bamboo Link Road vbc. 100 dah a nih thu te, MNF sawrkar hmasa in District pathum a pek tawh chu kum 2018-a MNF sawrkar a lo din leh khan Saitual, Khawzawl leh Hnahthial-ah hian District tihpuitlin nghal a nih thu te, SASCI Part I 2023 - 2024 hnuaiah Chief Minister ngenna in Union Finance Secretary chuan cheng nuai 20,000 Mizoram pek belh a nih tur a sawi bawk niin a sawi a. Kumin inthlanpuiah pawh MNF chuan hnehna sang tak a chan leh ngei an beisei tih an sawi bawk.