Cheng nuai 266.5 senga sak Ngentiang PHC Building thar Health Minister in a hawng

Serchhip CMO hnuaia awm Ngentiang khuaa cheng nuai 266.5 senga Primary Health Centre (PHC) Building sak thar chu nimin khan Health Minister Dr. R. Lalthangliana chuan a hawng a, he hun hi bialtu MLA leh AH&Vety Minister Er. Lalrinawma pawhin a hmanpui bawk a ni.

Ngentiang PHC Building thar lawmna Ngentiang Community Hall-a neih ah Health Minister Dr. R. Lalthangliana chuan tun kum nga chhungin Community Health Centre sak thar 20 chuang kan neih thu leh hawn mai theih tura sak zawh tawh an la awm nual bawk tih sawiin, Ngentiang Primary Health Centre sak thar pawh hi Ngentiang leh a chhehvel mipuiten tangkai taka an lo hman a beisei thu a sawi a. Kum 2 leh thla 3 chhung vel Covid hripuiin min nuai thu leh khawvel a buai hle tih sawiin, “Sum tam tak sawrkarin a hmang ral a. Keini ram pawhin kan pumpelh thei bik lo a nih kha. Hripui vang hian Health Department bikah pawh hna lak tura tihfel tawh tam tak kan la thei ta rih ta lo,” a ti a. Mizoram in Sub-Centre 375; Primary Health Centre 61 leh Community Health Centre 9 kan nei tih sawiin, “Kan Sub-Centre zawng zawng te hi Health and Wellness Centre-ah kan hlangkai hman vek ta thova, a ropuiin a chhinchhiah tlak hle a ni,” a ti a. Covid bakah Vawk pul hri, ramri buai leh Myanmar, Bangladesh leh Manipur atanga unaute raltlan buaipui chunga hmasawnna tam tak kawng hrang hranga kalpui zel a ni chu lawmawm a tih thu a sawi bawk.

Bialtu MLA leh Minister Er. Lalrinawma pawhin Ngentiang damdawi In building thar hawn a ni ta chu a lawm takzet tih sawiin, Ngentiang leh a chhehvel khuate tan he damdawi In hi a hlut thu leh tunah phei chuan hmunhma tha lehzual nen mipuite tan hna an thawk dawn tih a sawi a. Hriselna pawimawh thu leh khawvel sawrkar dangte pawh hian inthlana an buaipui leh an zawrh ber chu Health Care Scheme a ni fo thin sawiin, “Kan bial chhungah Health and Wellness Centre hmun 8 lai mai a sawrkar-in min pe hi a ropuiin kan tan an hlu takzet a ni,” a ti bawk.

Nimin-a hawn tak Ngentiang PHC Building hi NABARD (RIDF XXVI 2020-21) Fund cheng nuai 266.5 senga sak niin Feb. 2021 khan sak tan a ni a, Zopa chhiara chhawng hnih a sang niin, tun thla ni 6 khan a sak hna hi zawhfel a ni. Building chhawng hnuai zawk (Ground Floor)-ah Male leh Female Ward, Clinics, Dressing Room, X-Ray Room, Store Room, Preparation Room, Laboratory, Waiting Area, Minor OT, Casualty, Office, Kitchen leh a dangte an awm a, a chhawng chung zawk-ah hian Main Centre leh Main Hall te awmin C. Lalrengliana, Aizawl sak a ni.