Karleh ah In sak tanpuina dawn leh hman beisei a ni

Pradhan Mantri Awas Yojana (Urban)-PMAY (U)/Housing For All hnuaia Serchhip atanga In sak tanpuina dawng tur 1st DPR a mi te chuan karleh khian tanpuina an dawn tur thawh khatna chu an dawn kim hman beisei a ni.
Serchhip-a District Urban Development Officer (DUDO) Office atanga thu kan dawn danin PMAY/HFA hnuaia 1st DPR-ah hian a tirah In sak tanpuina dawng tur hi mi 1012 an awm a, an zinga 404 te chuan 1st Phase tanpuina dawngin a hnuah 2nd Phase a dawng tur zinga mi 43 te chu 1st Phase ah hian khung lehin 1st Phase-ah hian mi 447 in tanpuina hi an dawng a. A la bang mi 502 te chu 2nd Phase dawng tur hian thlan leh niin heng mite hi tunhnai khan Serchhip Auditorium-ah kokhawmin an hmalak dan tur hrilhfiah an nih bakah intiamkamna te ziahtir an ni a, buaipui ngai ang ang te buaipui a nih hnuah karleh lam khian tanpuina an dawn tur hi an dawn tan theih beisei a ni.

PMAY-HFA 1st DPR a tanpuina dawng turte hi a tirah mi 1012 ni mah se hma la tha lo te paih an nih bakah mahni inhnukdawk te an awm avangin 1st DPR atanga tanpuina dawng zawng zawng hi mi 949 an ni dawn ta a ni.