Manipur atanga Mizoram-a rawn raltlan te chhawmdawl dan tur hrang hrang sawiho a ni

Manipur ram buai avanga Mizoram-a rawn raltlante chhawmdawl dan tur hrang hrang chu nimin khan Executive Committee on Internally Displaced Persons (IDPs) of Manipur chuan an ngaihtuah.

Manipur atanga Mizoram-a rawn raltlante chhawmdawl dan tur buaipui tura a bik taka ruat Executive Committee on Internally Displaced Persons (IDPs) of Manipur hi nimin khan Aizawl-a Forensic Laboratory Conference Hall-ah an Chairman, Home Department-a Commissioner & Secretary H. Lalengmawia hova thukhawmin tun thla ni 5-a High-Level Committee thurel bawhzui tawh dan an sawiho bakah, hmalak chhunzawm zel dan tur chungchang an sawiho a. Thutkhawm kaihruaitu Home Commissioner chuan Chief Minister Zoramthanga'n raltlante (Internally Displaced Persons) tanpuina Prime Minister leh Union Home Minister hnena a dil bawhzui tura New Delhi-a an zin report pein, Sports Minister Robert Romawia Royte hova sawrkar laipui hotute an dawr kual hnuah hlawhtlin beiseina sang tak an neih thu a sawi a. Relief Camp awmna Aizawl, Kolasib leh Saitual District-a Deputy Commissioner te leh Central YMA hruaitu ten raltlante chhawmdawlna kawnga hma an lak dan leh harsatna an tawh te tarlangin, a sutkian dan tur te sawiho a ni a. Fur khua a in tan tawh nen raltlante tawmhulna tur Temporary Shelter sak chawp hman ai chuan sawrkar hmunhma remchang luah tur zawn tha an ti bawk.

Meeting hian raltlante chhawmdawlna tur sum leh pai a theih ang anga dap dan ngaihtuah nise tiin MLA leh sawrkar hnathawk zingah raltlante tana sum leh pai thawh thei an awm chuan hmalak nise an ti a. School Education Department report-ah Mizoram-ah raltlan zirlai 1500 chuang sawrkar School hrang hrangah admit niin, raltlan zirlai admission ti duh ten document an neih loh pawhin an dinhmun hriatthiam sakin ngaihnathiamna an nei tih tarlan a ni bawk a. Higher Education zirlaite chungchang pawh hmalak mek a nih thu tarlan a ni.

Raltlan zingah damlo leh natna khirh tuar te enkawl dan tur mumal tak ruahman a tul thu tarlan a ni a. Health Department Official ten raltlante hriselna dinhmun an vil dan leh damlote an buaipui dan sawiin, ICDS nen tang tlanga raltlan naupangte eitur tha an pek thin thu tarlan a ni bawk a. Raltlante chhinchhiahna mumal leh felfai tak siam tura HLC thutlukna lo awm tawh sa bawhzuiin Home Department leh ICT Department ten hma an lak mek tih leh Raltlante buaipuitu tur District leh Village Level Committee siam tura thutlukna a lo siam tawh bawhzuiin a inkaihhruaina dan leh a ruangam mumal tak nen Home Department in an ruahman mek thu tarlan a ni bawk.